टंक कुंवर
धनगढी । धर्म खोज्न कतै जानु पर्दैन । निस्वार्थ भावनाले समाज र देशको लागि काम गर्ने मान्छे नै सबैभन्दा ठूलो धार्मिक हुन्छ । यो भनाइ हो, धनगढीका सरसफाइ अभियानकर्ता लोकबहादुर खड्काको ।
धनगढी उपमहानगरपालिका वडा नं. ५, भैरव टोलका खड्का हरेक दिन बिहान ४ बजे उठ्छन् । बिहान १० बजेसम्म टोल, छिमेक र सडकमा फालिएका प्लास्टिकजन्य फोहोर टिप्ने उनको दैनिकी हो ।
२०७५ सालदेखि सुरु भएको उनको यो अभियान अहिले जीवनशैली बनेको छ । हातमा लाठी, टर्च, काँधमा माइक र पिठ्युँमा झोला बोकेर उनी धनगढीका वडा नं. ५ र ६ का विभिन्न स्थानमा पुगेर प्लास्टिकजन्य फोहोर टिप्छन् ।
टिपेको फोहोरको झोला उनले उच्च स्थान वा बिजुलीको खम्बामा झुण्डाउने गर्छन् । उनले भने, नगरपालिकाको फोहोर व्यवस्थापन टोलीले सहजै देखेर उठाउन सकोस् भनेर मैले उच्च ठाउँमा झुण्डाउने गरेको हुँ ।
पहिले आफैले फोहोर व्यवस्थापन गर्नुपर्ने गरेको सुनाउँदै उनले भने, धनगढीमा नगर प्रमुख गोपाल हमाल निर्वाचित भएपछि काम गर्न धेरै सहज भएको छ । अहिले फोहोर टिपेर देखिने ठाउँमा राख्दा नगरपालिकाले तुरुन्तै व्यवस्थापन गरिहाल्छ ।
खड्काले आफू कुनै पनि संघसंस्थाबाट तलब नलिने स्पष्ट पारे । म निस्वार्थ रुपमा काम गर्ने मान्छे हुँ । मरुन्जेल गाउँ र समाजको लागि सेवा गर्ने मेरो एउटै लक्ष्य हो, उनले भने ।
प्लास्टिकजन्य फोहोर संकलन गर्न थालेको आउँदो कार्तिकमा ८ वर्ष पुग्न लागेको उनले बताए । उनले धनगढी उपमहानगरपालिकाले थप जनशक्ति परिचालन गरेर प्लास्टिकमुक्त शहर निर्माणमा ध्यान दिनुपर्ने सुझाव दिए ।
धनगढीका वडा नं.५ र ६ अहिले लगभग प्लास्टिकमुक्त भइसकेका छन् । मेरो एउटै उद्देश्य धनगढीलाई प्लास्टिकमुक्त शहर बनाउनु हो, खड्काको भनाइ छ ।
