धनगढी । कैलालीको धनगढी उपमहानगरपालिका–७ जाखोरतालका विवेक चौधरीले ‘माछाघर’ नामक होटल सञ्चालन गर्दै आएका छन् । विगत अढाइ वर्षदेखि ‘माछाघर’ सञ्चालन गर्दै आएका चौधरीले मनग्य आम्दानी गर्दै आएका छन् ।

उनले सञ्चालन गरेको ‘माछाघर’ होटल उनको आम्दानीको मुख्य स्रोत मात्रै बनेको छैन्, अन्य छ जनाको रोजगारीको माध्यम पनि बनेको ।

उमेरले ३१ वर्षीय चौधरी अढाई वर्षअघि १५ लाख लगानीमा सुरु गरेको होटल व्यवसाय अहिले विस्तार गर्दै लगेका छन् । कमाइ राम्रो हुन थालेपछि होटल विस्तार गरेको उनले बताए । उनले अहिले करिब ५० लाख लगानी पुगिसकेको बताए ।

उनले होटलमा खाजा र खानाका साथै स्थानीय थारु परिकारलाई प्राथमिकता दिने गरेको बताए । ‘हाम्रो यहाँ खाना तथा नास्ता पाइन्छ । विशेष गरि थारु परिकारको यहाँ स्वाद लिन पाइन्छ’ उनले भने ‘थारु परिकारको स्वाद लिन चाहनेका लागि अनदीको भात,ढिक्री,बयरको चटनी,घोँगी,गगटालगायतको परिकार बनाउने गरेका छौँ ।’

त्यस्तै,उनले पोखरीमा पालन गरेका माछा,नदीका लोकलमाछाको परिकारसमेत बनाउने गरेको बताउँदै माछाका सम्पूर्ण परिकार बनाउने गरेको बताए । स्थानीय स्वाद र मौलिक परिकारलाई प्राथमिकता दिँदा ग्राहकको आकर्षण बढेको उनको भनाइ छ ।

चौधरी विगतमा कैलाली उद्योग वाणिज्य संघमा सामान्य रोजगारी गर्थे । उनले भने ‘म पहिला उद्योग वाणिज्य संघमा मासिक आठ हजारमा काम गर्थे । जागिर भन्दा आफैले केही गर्नुपर्छ भनेर होटेल व्यवसायमा लागेको हुँ ।’

उनले होटल व्यवसायबाट आम्दानी पनि राम्रै हुने गरेको बताए । होटलको आम्दानीले घर खर्चसँगै हुने गरेको उनले बताए ।
उनले भने ‘अहिले कमाइ पनि राम्रै छ । मासिक दुई लाख जति आम्दानी हुन्छ । पाँच जनाको परिवार छ । सबै घरखर्च,छोराछोरीको पढाइलेखाइ खर्च, औषधोपचार,लुगाफाटो,खाद्यान्न लगायतको व्यवस्था गर्न सहज भएको छ ।’

उनले होटेल व्यवसाय स्वरोजगार भइएको बताए । उनले भने ‘म मात्रै स्वरोजगार भएको छैन्,छ जनालाई रोजगारी समेत दिएको छु ।’
उनले लगनशील भएर व्यवसायमा लागे सफल भइने बताए । उनले भने ‘जुनसुकै व्यवसायमा पनि मेहनत गर्नुपर्छ,लगनशील भएर काम गरे सफल भइन्छ । रोजगारीका लागि विदेशै जानुपर्छ भन्ने छैन् । नेपालमै राम्रै कमाइ गर्न सकिन्छ ।’