धनगढी । कैलालीको धनगढीमा मादक पदार्थ सेवन जाँचमा खटिएका प्रहरीलाई मोटरसाइकलले ठक्कर दिँदा तीन प्रहरी घाइते भएका छन् ।
धनगढी उपमहानगरपालिका-२ स्थित पेट्रोल पम्पनजिक बुधबार राति ट्राफिक प्रहरीसहितको संयुक्त मापसे चेकिङमा खटिएका प्रहरीलाई मोटरसाइकलले ठक्कर दिएको हो ।
प्रहरीका अनुसार कञ्चनपुरको पुनर्वास नगरपालिका-११ का २३ वर्षीय आशिष चौधरीले चलाएको से ३ प ८९५० नम्बरको मोटरसाइकलले चेकिङमा खटिएका प्रहरीलाई ठक्कर दिएको थियो ।
मोटरसाइकलको ठक्करबाट प्रहरी हवल्दार राधिका कुमारी शाही, प्रहरी हवल्दार उज्वलसिंह साउँद र प्रहरी सहायक हवल्दार कमला खत्री घाइते भएका जनाइएको छ ।
घटनापछि प्रहरीले मोटरसाइकल चालक चौधरीसँगै मोटरसाइकलको पछाडि सवार कैलालीको बर्दगोरिया गाउँपालिका-६ का १७ वर्षीय समीर चौधरीलाई समेत नियन्त्रणमा लिएको छ।
