धनगढी। कञ्चनपुरको बेदकोट नगरपालिका-१० सिद्धनाथ चोकबाट खैरो हेरोइनजस्तो देखिने पदार्थसहित तीन जना पक्राउ परेका छन् ।
लागूऔषधको कारोबार भइरहेको भन्ने गोप्य सूचनाका आधारमा प्रहरीले बेदकोट नगरपालिका-१० बस्ने ३२ वर्षीय यादव शाहुको घरकोठामा खानतलासी गरेको थियो । सो क्रममा कोठाभित्र लुकाइछिपाइ राखिएको १४ ग्राम ६९० मिलिग्राम खैरो हेरोइनजस्तो देखिने धुलो पदार्थ फेला परेको प्रहरीले जनाएको छ ।
उक्त पदार्थ फेला परेपछि प्रहरीले घरधनी शाहुसहित सोही नगरपालिका-१ बस्ने ३० वर्षीय मुकेश मल्ल र वडा नम्बर ३ बस्ने ३२ वर्षीय महेन्द्र चन्दलाई पक्राउ गरेको जनाएको छ ।
सोमबार दिउँसो लागूऔषध नियन्त्रण ब्युरो शाखा कार्यालय महेन्द्रनगर र अस्थायी प्रहरी पोष्ट दैजीबाट संयुक्त रूपमा खटिएको प्रहरी टोलीले उनीहरूलाई पक्राउ गरेको जनाएको छ ।
घटनाबारे प्रहरीले थप अनुसन्धान गरिरहेको जनाएको छ ।
