काठमाडौं- निवर्तमान हुनै लागेका सातै प्रदेशका मुख्यमन्त्रीहरुको सम्मेलन हुने भएको छ । मुख्यमन्त्रीबाट बिदा हुनुपूर्व पुस १५ गते लुम्बिनी प्रदेशको राजधानी दाङको देउखुरीमा सम्मेलन गर्ने तयारी गरिएको हो ।
प्रदेशसभाले पुस २१ गते नयाँ सदस्यलाई शपथ खुवाउने र पहिलो बैठकबाट प्रदेशहरुमा मुख्यमन्त्री नियुक्तिको प्रक्रिया सुरु हुने भएकाले मुख्यमन्त्रीहरुले त्यसअघि नै सम्मेलन गर्न लागेका हुन् । लुम्बिनीका मुख्यमन्त्री कुलप्रसाद केसीको प्रस्तावमा लुम्बिनीमा सम्मेलन गरेर प्रदेशको ५ वर्षे समीक्षा र संघीयता कार्यान्वयनका लागि अब बन्ने नयाँ संघीय संसद्लाई सुझाव दिने उद्देश्यले सम्मेलन आयोजना गरिएको हो ।
लुम्बिनी प्रदेश सरकारले नयाँ स्थानमा स्थायी राजधानी कार्यान्वयन गर्न लागेको प्रचार र दाङको देउखुरीमा सातै प्रदेशका मुख्यमन्त्रीहरुको भ्रमण गराउने उद्देश्यले पनि देउखुरीमै सम्मेलन आयोजना गरिएको लुम्बिनी प्रदेश सरकारले जनाएको छ ।
सम्मेलनमा लाग्ने खर्च लुम्बिनी प्रदेश सरकारबाटै हुनेछ । सम्मेलनमा लुम्बिनीका केसीसहित प्रदेश १ का राजेन्द्र राई, मधेस प्रदेशका लालबाबु राउत, वाग्मतीका राजेन्द्रप्रसाद पाण्डे, गण्डकीका कृष्णचन्द्र नेपाली, कर्णालीका जीवनबहादुर शाही र सुदूरपश्चिमका त्रिलोचन भट्ट सहभागी हुनेछन् ।
वाग्मतीका पाण्डेले मुख्यमन्त्रीबाट राजीनामा दिएको भए पनिउनी सहभागी हुने जानकारी गराएको सम्मेलनको तयारी गरिरहेका लुम्बिनी प्रदेशका आन्तरिक मामिला, कानुन तथा सञ्चारमन्त्री तिलकराम शर्माले बताए ।
सम्मेलनले प्रदेश सरकारहरुको ५ वर्षका उपलब्धिको समीक्षा गर्ने, कार्यसम्पादनमा संघीय सरकारबाट भएका समस्या समाधानखोज्ने, बाझिएका र बन्न नसकेका कानुन निर्माणका लागि अबको संघीय संसद्लाई सुझाव दिने विषयमा गम्भीर छलफल गर्ने उनले बताए ।
