रुपन्देही –बुटवल उपमहानगरपालिका वडा नं १३ बेलवास झोलुङ्गे पुल नजिक ताराटोलमा नेकपा एमाले निकट युवासंघका जिल्ला सदस्य तथा अनेरास्ववियु बुटवल उपमहानगर कमिटी उपाध्यक्ष दिपेशराज नेपालको घरमा आक्रमण हुँदा एक जनाको मृत्यु भएको छ । शुक्रबार साँझ आक्रमणमा परिवारका सदस्य घाइते भएका छन् ।
आक्रमणबाट नेपालका करिब ६० वर्षीय बुवा यमप्रसाद नेपालको मृत्यु भएको छ । उनको घर नजिकै रहेको एडमनसिटी अस्पतालमा उपचारका क्रममा मृत्यु भएको स्थानीयले जनाएका छन् । अहिले घटनास्थलमा प्रहरी पुगेर अनुसन्धान सुरु गरेको इलाका प्रहरी कार्यालय बुटवलका डिएसपी दानबहादुर थापाले बताए ।
घटनामा संलग्न रहेको आशंकामा ४ जनालाई नियन्त्रणमा लिइएको छ । एमाले सम्बद्ध नेतृत्वहरुले आक्रमणकारी तथा हत्यारालाई तुरुन्त कार्वाहीको माग गरेका छन् ।
एमाले जिल्ला सदस्य नकुल शाहीले अराजक समूहले युवासंघका नेता दिपेशराज नेपालको घरमा आक्रमण गरी बुवा यमप्रसाद नेपालको हत्या गरेको बताउँदै अपराधीलाई कडा कारबाहीको माग गरेका छन् ।
