कञ्चनपुर- कञ्चनपुरमा अवैध रूपमा सञ्चालनमा रहेका दुई वटा क्रसर उद्योग बन्द गरिएको छ । गृह मन्त्रालयको निर्देशनपश्चात् जिल्ला अनुगमन समितिले अनुगमन गरेर अवैध रूपमा सञ्चालनमा रहेका क्रसर उद्योग बन्द गरिएको हो ।
प्रमुख जिल्ला अधिकारी गोपालप्रसाद अर्यालका अनुसार कृष्णपुर नगरपालिका ५ मा रहेको महरा निर्माण सेवा र सोही नगरपालिकामा रहेको कैलापाल कंक्रिट उद्योगले सञ्चालन गरेको क्रसर उद्योग बन्द गरिएको छ । उनका अनुसार महरा निर्माण सेवाले अनुमति नलिई क्रसर सञ्चालन गरेको र कैलापालले नवीकरण नगरेको पाइएको हो ।
‘एउटाले अनुमति देखाउन सकेन, अर्कोले नवीकरण गरेको छैन,’ प्रमुख जिल्ला अधिकारी अर्यालले भने, ‘अनुगमन टोलीले तत्काल बन्द गराएको हो ।’ गृहले दर्ता नभई सञ्चालनमा रहेका क्रसर उद्योग बन्द गराउन भनेर निर्देशन दिएको छ । जिल्लामा रहेका अन्य क्रसर उद्योगको अनुगमनका लागि पनि जिल्ला समन्वय समिति उपप्रमुख रामकुमारी रानाको संयोजकत्वमा अनुगमन समिति गठन गरिएको प्रमुख जिल्ला अधिकारी अर्यालले बताए ।
जिल्ला समन्वय समितिका प्रमुखको संयोजकत्वको अनुगमन समितिले उपप्रमुखको संयोजकत्वमा अनुगमन उपसमिति गठन गरेको छ । समितिका प्राविधिकसँगै जिल्ला प्रशासनका कर्मचारीसमेत छन् । कञ्चनपुरमा हाल ५ वटा क्रसर उद्योग सञ्चालनमा छन् । उक्त उद्योगहरूको अनुगमन गरेर उपसमितिले ७ दिनभित्र प्रतिवेदन बुझाउने समयावधि तोकिएको छ ।
