धनगढी– प्राज्ञिक विद्यार्थी परिषद् नेपालको ९औं राष्ट्रिय अधिवेशन धनगढीमा हुने भएको छ । परिषदले शनिबार धनगढीमा पत्रकार सम्मेलनको आयोजना गर्दै अधिवेशन आयोजनाबारे जानकारी दिएको हो ।
‘आत्मनिर्भर अर्थतन्त्र र भ्रष्ट्राचार नियन्त्रणका लागि परिषद्को नवौं राष्ट्रिय अधिवेशन’ भन्ने मुल नारासहित परिषदले आगामी चैत्र १८, १९ र २० गते अधिवेशन आयोजना गर्न लागेको हो ।
परिषदले पत्रकार सम्मेलनमार्फत राष्ट्रिय अधिवेशनको लोगो समेत सार्वजनिक गरेको छ । अधिवेशनमा देशभरका विद्यार्थी तथा शिक्षक कार्यकर्ता, अतिथि प्रतिनिधि तथा विशेष व्यक्तिहरू सहित १२०० जना प्रतिनिधिहरूको सहभागिता रहने परिषद्का महासचिव छितराज न्यौपानेले बताए ।
उनका अनुसार अधिवेशनको एक सत्रमा राष्ट्रिय पृथ्वी युवा प्रेरणा पुरस्कारद्वारा समाजमा प्रेरणादायी कार्य गर्ने युवालाई पुरस्कृत गरिनेछ । अधिवेशनमा राष्ट्रिय सुरक्षा, आत्मनिर्भर अर्थतन्त्र, पर्यटन, कृषि, उद्यमशीलता, शिक्षा, सेवा एवं संवेदना आदि विषयमा विशिष्ट विद्वानहरूको उपस्थितिमा समानान्तर सत्र सञ्चालन हुनेछन् ।
अधिवेशनले राष्ट्रिय अध्यक्ष एवं राष्ट्रिय महासचिवको निवाचन सहित केन्द्रीय कार्यकारिणी समितिको घोषणा हुनेछ । विद्यार्थी परिषद् २०५२ सालमा स्थापना भईअसल व्यक्ति निर्माणमार्फत् राष्ट्र पुनः निर्माणको अभियानमा नेपालका ७७ वटै जिल्लामा निरन्तर आफ्ना गतिविधिहरू सञ्चालनसंगै शतत रूपमा सक्रिय हुँदै आइरहेको छ ।
नेपालको विद्यार्थी आन्दोलनलाई सकारात्मक दिशा प्रदान गर्दै शिक्षाक्षेत्रलाई रचनात्मक एवं दलीय राजनीतिमुक्त गर्ने संकल्पका साथ परिषद् शिक्षाक्षेत्रमा सक्रिय छ।
आफ्नो स्थापना कालदेखि नै विभिन्न सामाजिक तथा राष्ट्रिय विषयमा जनजागरण अभियान, सामाजिक गतिविधि, सेवाकार्य तथा शिक्षाका विविध विषयमा केन्द्रित रहँदै संगठन विस्तार तथा सुदृढीकरणका लागि निरन्तर सक्रिय छ ।
जसका लागि परिषद्ले प्रत्येक दुई वर्षमा विभिन्न विषयमा केन्द्रित रहँदै आफ्नो राष्ट्रिय अधिवेशन गर्दै आइरहेको छ ।
