मोहनसिंह साउँद
प्रेम गर्नेहरूका लागि
कुनै भ्यालेन्टाइन डे पर्खिरहनु पर्दैन
सच्चा प्रेमको कुनै दिन बार हुने गर्दैन
नि:स्वार्थ मुटु साट्नेहरूका लागि
कुनै प्रेम दिवस मनाइरहनु पर्दैन
हृदयमा हुने प्रेममा
म प्रेम गर्छु भनिरहनु पर्दैन ।
प्रेम त हरेक सेकेन्डमा उस्तै हुन्छ,
जसलाई तराजुमा जोख्न सकिँदैन
प्रेम त हृदयमा जीवित भइरहन्छ
प्रेम दिवस कहिले हो भनी
क्यालेण्डरको कुनै पाना पल्टाइरहनु पर्दैन
कुनै प्रेम दिवस मनाइरहनु पर्दैन ।
सच्चा प्रेममा त्यागको भावना हुन्छ
प्रेमी प्रेमिकाले एक अर्काको खुसी
देख्नुमा सच्चा प्रेमभाव लुकेको हुन्छ
तिमी मेरो/मेरी हुनै पर्छ नत्र भने भन्नुमा
प्रेम होइन राक्षसी भाव लुकेको हुन्छ ।
जसरी मन पराएर फूल उखेल्नुमा
नक्कली प्रेमको नाटक लुकेको हुन्छ
तर माया गरेर फुललाई मलजल गर्नुमा नै
साँचो प्रेम झुलेको हुन्छ
प्रेमी-प्रेमीकाले एक अर्कामा
खुसी देख्नुमा नै
सच्चा प्रेम फुलेको हुन्छ।
त्यसैले प्रेमलाई
कुनै तराजुमा जोख्ने नगर
सच्चा प्रेम गर्नको लागि
कुनै दिवस कुर्ने नगर
पश्चिमा भ्यालेन्टाइन डेको
पर्खाइमा पर्ने नगर
प्रेम दिवस मनाउन
पात्रोको पाना पल्टाउने नगर
हग डे, किस डे भन्दै
प्रेम सप्ताह मनाउने नगर
वर्षैभरि हुने प्रेमलाई
एक दिनमा सीमित नपार
सच्चा प्रेम गर तर स्वार्थमा नपर
कायर भई असफल प्रेममा हिंसा नगर।
