धनगढी -नेपाली सेना सुदूरपश्चिम प्रदेश पृतना हेडक्वाटरले इतिहासदेखि वर्तमानसम्मका सैनिक सम्बन्धी विविध सामग्री तथा गतिविधि समेटेर दुई दिने बृहत प्रदर्शनी आयोजना गरेको छ ।
महाशिवरात्री तथा २६० औं नेपाली सेना दिवसको अवसरमा कैलालीको धनगढीमा रहेको नम्बर ७ युद्धकवच गुल्म, बोराडाँडी व्यारेकमा ‘विविध सैनिक प्रदर्शनी तथा युनिट रन –२०७९’ शुरु भएको हो ।
नेपाली सेनाले कसरी काम गर्छ के गरिरहेको छ भन्ने कुरालाई आम जनमानससम्म पुर्याउने उद्देश्यले नै यस कार्यक्रमको आयोजना गरिएको सुदूरपश्चिम प्रदेश पृतनाका पृतनापति विजय थापाले बताए । नेपाली सेनाले भित्री रुपमा गरिरहेको काम बारे पनि जनमानसले जानकारी पाए नेपाली सेनाप्रति अझै अविश्वास बढेर जाने उनको भनाइ छ ।
नेपाली सेनाको तीन किसिमका फौजहरु हुने गरेका छन् । जसमध्ये कमव्याड फौज (युद्ध फौज), कमव्याड सर्पोट (युद्ध मध्ती फौज) र कमव्याड सर्विस सर्पोट हुन् । यी तिनै वटै फौजहरुलाई प्रर्दशनीमा राखिएको र जनतामा एक किसिमको जनविश्वास बढाउनका लागि ठूलो मद्दत पुग्ने उनले बताए ।
एकताको सन्देश दिने र यस क्षेत्रको खेलकुद विकासका लागि नेपाली सेनाले राष्ट्रिय अन्तराष्ट्रिय खेलकुदमा योगदान दिइरहेको र प्रदेशमा खेलकुद विकासमा थप टेवा पुग्ने उनले बताए ।
सुदूरपश्चिम प्रदेशका प्रदेश प्रमुख देवराज जोशीको प्रमुख आतिथ्यमा भएको कार्यक्रममा धनगढी उपमहानगरपालिकाका नगर प्रमुख गोपाल हमाल लगायत प्रदेश सरकारका विभिन्न मन्त्रालयका प्रमुख तथा प्रतिनिधि, संघ÷संस्थाका प्रतिनिधि तथा प्रमुख, सञ्चारकर्मी, विभिन्न विद्यालयका विद्यार्थी तथा शिक्षक लगायतको सहभागिता रहेको थियो ।
