धनगढी- विपद जोखिम न्युनीकरणका लागि तीन तहकै सरकार एक ठाउँमा उभिनुपर्नेमा सरोकारवालाहरुले जोड दिएका छन् । सुदूरपश्चिम प्रदेशको आन्तरिक मामिला तथा कानुन मन्त्रालयको आयोजनामा आइतबार धनगढीमा भएको प्रादेशिक मानवीय सहायता र आकस्मिक कार्ययोजना कार्यशालामा सहभागी सरोकारवालाहरुले यस कुरामा जोड दिएका हुन् ।
कार्यक्रममा बोल्दै धनगढी उपमहानगरपालिकाका प्रमुख गोपाल हमालले कुनै एक तहले चाहेर मात्रै विवद जोखिम न्युनीकरण गर्न नसकिने बताए । उनले विपद जोखिम न्युनीकरणका लागि तीन वटै तहका सरकार एकजुट भएर लाग्नुपर्ने धारणा राखे । उनले धनगढीले उपमहानगरपालिका पनि विपद जोखिम न्यूनिकरणका लागि जुटिरहेको बताए ।
आन्तरिक मन्त्रालयका सचिव सचिव कमलराज ढकालले सुदूरपश्चिम विपदको दृष्टिकोणले अत्यन्तै जोखिम मानिएको बताए । प्रदेशमा आइलाग्ने विपद सम्बन्धी प्रदेश सरकारले ५ वटा कलस्टर बनाएर अगाडि बढिरहेको उनले जानकारी दिए । उनले अगामी दिनमा स्थानीय तहहरुसँग पनि समन्वय–सहकार्य गरेर विपद सम्बन्धी काम गर्ने प्रदेश सरकारको योजना रहेको बताए ।
मन्त्रालयका सचिव ढकालको अध्यक्षतामा भएको कार्यक्रममा धनगढी उपमहागनरपालिकाका प्रमुख हमाल प्रमुख अतिथी रहेका थिए । कार्यक्रममा सात वटै मन्त्रालयका सचिवहरु, कैलाली–कञ्चनपुरका प्रमुख जिल्ला अधिकारी, तीनवटै सुरक्षा निकायका सुरक्षाकर्मीहरु, धनगढी उपमहनानगरपालिका वडाध्यक्षहरु, विभिन्न संघ–संस्थाका कर्मचारीलगायतको सहभागिता रहेको थियो ।
