धनगढी- सुदूरपश्चिम प्रदेशका मुख्यमन्त्री कमलबहादुर शाहले आफूलाई दुईतिहाइ प्रदेश सभा सदस्यले विश्वासको मत दिने विश्वास व्यक्त गरे । विश्वासको मत लिने तयारी गरिरहनु भएका मुख्मन्त्री शाहले आफूलाई नेपाली कांग्रेसका १९, नेकपा (माओवादी) केन्द्रका १०, नागरिक उन्मुक्तीका सात, नेकपा (एकीकृत समाजवादी) का चार र स्वतन्त्रका एक जना प्रदेश सदस्य गरी ४१ जनाले विश्वासको मत दिने बताए ।
५३ सदस्यीय प्रदेश सभामा विश्वासको मतका लागि २७ र दुईतिहाइका लागि ३७ मत आवश्यक पर्छ । मुख्यमन्त्री शाहले नागरिक उन्मुक्तीको समेत पछिल्लो पटक बनेको नयाँ गठवन्धनमा सामेल भएपछि दुईतिहाइ मत पाउने विश्वास व्यक्त गरे ।
मुख्यमन्त्री शाहले आफूलाई फागुन २२ गते भित्रै विश्वासको मत लिने गरेर वातावरण बनाइ दिन शिर्ष नेताहरुसँग आग्रह गरेको जानकारी दिए । उनले विश्वासको मत पाएपछि मन्त्रीमण्डल विस्तार हुने पनि बताए । अहिले सुदूरपश्चिम सरकारसँग तीन सदस्यीय मन्त्रिपरिषद छ ।
