धनगढी – प्रभात मिडिया एन्ड इभेन्ट प्रालिले आयोजना गरिरहेको सुदूरपश्चिम प्रदेश स्तरीय नृत्य र गायन विधाको प्रतियोगिता वाई वाई एसइई आइडलको आज सम्पन्न भएको छ । कैलारी गाउँपालिका हसुलियाको दीपेन्द्र मा.वि. मा एघारौँ अडिसन सम्पन्न भएको हो । २०७९ पुसमा सुरु भएको यस कार्यक्रमका अडिसनहरू २०८० जेठ सम्म सुपका ९ वटै जिल्लामा आयोजना हुनेछन् भने २०८० असार २ गते फाइनल धनगढीमा सम्पन्न हुनेछ ।
सुदूरपश्चिमका कुना काप्चामा लुकेर रहेका नृत्य र गायन प्रतिभा उजागर गर्ने उद्देश्यले आयोजित यस प्रतियोगिताका २५ अडिसनमा सहभागी नृत्यहरू मध्ये उत्कृष्ट २० र गायन प्रस्तुति मध्ये उत्कृष्ट १० प्रस्तुतिलाई मात्र फाइनलमा समावेश गरिनेछ ।
नृत्य तर्फको विजेता र उप-विजेताले नगद पुरस्कार क्रमश: रु. ५० हजार र रु. २५ हजार सहित ट्रफि, विभिन्न गिफ्ट ह्याम्पर पुरस्कार पाउने छन् भने गायन तर्फको विजेता र उप-विजेताले नगद पुरस्कार क्रमशस् रु २० हजार र रु। १० हजार सहित ट्रफि, विभिन्न गिफ्ट ह्याम्पर हात पार्नेछन् । साथै दुवै विधाका विजेता र उप-विजेताहरूले कक्षा ११ मा छात्रवृत्ति पनि पाउने छन् ।
यस कार्यक्रममा एसपिए र रेडिकल एकेडेमीको पनि सहयोग रहेको छ । भोलि धनगढीको थ्रि स्टार माविमा अडिसन हुन गइरहेको छ ।
