धनगढी – सुदूरपश्चिम प्रदेशका मुख्यमन्त्री कमल बहादुर शाहले फागुन २१ गते विश्वासको मत लिने भएका छन् । आज मुख्यमन्त्री तथा मन्त्रिपरिषद्को कार्यालयमा सत्ता गठबन्धन दलका नेताहरूसँग उनले विश्वासको मत लिने विषयमा सामान्य छलफल गरेका हुन् ।
माघ २६ गते मुख्यमन्त्री नियुक्त भएका मुख्यमन्त्री शाहले ३० दिनभित्र विश्वासको मत लिइसक्नु पर्ने संवैधानिक व्यवस्था रहेको छ । अहिलेसम्म उनले विश्वासको मत लिने विषयमा ठोस निर्णय गर्न सकेका थिएनन् ।
मुख्यमन्त्रीमा शाह सुरक्षित रहे पनि केन्द्रबाट निर्देशन नआएको हुँदा उनले विश्वासको मत लिने मिति निर्धारण गरेका थिएनन् । तर, आज भने उनले २१ गते विश्वासको मत लिने आशय व्यक्त गरेको छलफलमा रहेका एक सांसदले बताए ।
विश्वासको मत लिनु भन्दा २ दिन अघि प्रदेश सभा सचिवालयमा दर्ता गर्नुपर्ने प्रदेश सभा नियमावलीमा उल्लेख । सोही अनुसार एक/दुई दिनमा प्रदेश सभामा पत्र पठाउने तयारी भइरहेको छ ।
