धनगढी – अत्तरियामा व्यवसायीहरूले बैङ्कको चर्को ब्याजदरका विरुद्ध आज पनि आन्दोलन गरेका छन् । चर्को बैङ्कको ब्याजदर घटाउनु पर्ने माग गर्दै उनीहरुले बुधवार पनि अत्तरियामा विरोध प्रदर्शन गरेका हुन् । उनीहरूले बिहान ९ बजेबाट ११ बजे सम्म बजार बन्द गरेर विरोध प्रदर्शन गरेका थिए ।
विरोध प्रदर्शनका क्रममा व्यवसायीहरूले अत्तरिया बजारमा परिक्रमा गरेर महेन्द्रनगर रोडमा रहेको ग्लोबल बैङ्क र महालक्ष्मी विकास बैङ्क अगाडि अगाडी कोण सभाको आयोजना गरेका थिए ।
कोणसभालाई सम्बोधन गर्दै हार्डवेयर व्यवसायी संघ कैलालीका उपाध्यक्ष नैन सिंह कार्कीले चर्को ब्याजदरका विरुद्ध भइरहेको आन्दोलनबाट माग पुरा नभए बैङ्क र सरकारलाई घुँडा धसाउनुपर्ने चेतावनी दिए । सरकारले व्यवसायीहरूका माग छिट्टै पुरा गर्नुपर्ने उनले बताए ।
