कैलाली- इन्जिनियर सागर ढकालले सुदूरपश्चिम प्रदेश कला र संस्कृतिले देशकै धनी प्रदेश भएको बताएका छन् । बिहीबार कैलालीको घोडाघोडी बहुमुखी क्याम्पसका विद्यार्थीहरूसँग अन्तरक्रिया गर्न पुग्नुभएका ढकालले प्रविधिको विकाससँगै आफ्नो कला संस्कृति हराउँदै गएको बताउँदै कला संस्कृति संरक्षणमा सुदूरपश्चिम प्रदेश देशकै पहिलो नम्बरमा रहेको बताएका हुन् ।
२०७९ को प्रतिनिधि सभा चुनावमा डडेल्धुराबाट आफूले स्वतन्त्ररुपमा चुनाव लड्ने क्रममा सुदूरपश्चिमका विभिन्न जिल्लाका कला संस्कृतिलाई नजिकबाट बुझ्न पाएका ढकालले भौतिक पूर्वाधारका विकासतिर बढी चासोभन्दा पनि संस्कार र संस्कृति जोगाउनु महत्त्वपूर्ण रहेको बताए ।
घोडाघोडी बहुमुखी क्याम्पसले आयोजना गरेको विकासमा प्राकृतिक स्रोतको प्रयोग र व्यवस्थापन र चुनौती विषयक अन्तरक्रिया कार्यक्रममा विद्यार्थीले विभिन्न प्रश्न तथा जिज्ञासा राखेका थिए । स्नातक तहका विद्यार्थी, भरत शाही, विनोद चौधरी, सपना परियार, हेलन बिनाडीलगायतले जिज्ञासा राखेका थिए ।
नेपालमा संस्कार र संस्कृति जोगाउनेमा सुदूरपश्चिम प्रदेश अब्बल रहेको उनले चर्चा गरे । विदेशको उदाहरण दिँदै उहाँले संस्कार र संस्कृतिलाई पर्यटनसँग जोडेर आम्दानीको स्रोत समेत बनाउन सकिने उनले बनाए ।
नेपाल प्राकृतिको एसी भएको बताउँदै उहाँले त्यसको सही सदुपयोग हुन नसकेको बताए । देशमा दूरदर्शी योजना सरकारले ल्याउन सके देशभित्र उद्योग, पर्यटनका विकास भई रोजगारीको सिर्जना हुने र युवाहरू धेरै विदेश पलायन हुनबाट रोकिने उनको भनाइ छ । इन्जिनियर ढकाल बिहीबार नै लम्की बहुमुखी क्याम्पस र टीकापुर बहुमुखी क्याम्पसमा भएको अन्तरक्रिया कार्यक्रममा समेत सहभागी थिए ।
