कञ्चनपुर- कञ्चनपुरको बेलौरीबाट लागुऔषधसहित दुई जना भारतीय पक्राउ परेका छन् । भारतबाट नेपाल आउँदै गरेका भारतको पिलिभित टिल्ला नम्बर ४ बस्ने सोनु सिंह र शुकदेव सिंहलाई मंगलबार दिउँसो बेलौरी नगरपालिका १० सडकघाट स्थित नेपाल भारत सीमा नजिकबाट पक्राउ गरिएको जिल्ला प्रहरी कार्यालय कञ्चनपुरले जानकारी दिएको छ ।
उनीहरूको साथबाट भारतीय नम्बर प्लेटको मोटरसाइकल सहित १० दशमलव ३६ ग्राम लागु औषध खैरो हिरोइन बरामद गरिएको कञ्चनपुर प्रहरी प्रवक्ता प्रहरी नायव उपरीक्षक प्रकाश डाँगीले बताएका छन् । यस सम्बन्धमा थप अनुसन्धान भइरहेको प्रहरीले जनाएको छ ।
सुदूरपश्चिम प्रदेश प्रहरी कार्यालय धनगढी कैलालीबाट आरआइटी टोली तथा जिल्ला प्रहरी कार्यालय कञ्चनपुर मातहत इलाका प्रहरी कार्यालय बेलडाँडी, बेलौरी र प्रहरी चौकी भुडाबाट खटिएको संयुक्त प्रहरी टोलीले गोप्य सूचनाको आधारमा चेक जाँच गरेको हो ।
