धनगढी- गर्भपतन गराउन क्लिनिक गएकी धनगढीकी एक महिलाको मृत्यु भएपछि आफन्तले जिल्ला प्रहरी कार्यालय घेराउ गरेका छन्। कैलालीको धनगढीमा रहेको मेरी स्टोप सामुदायिक क्लिनिकले जथाभाबी औषधी खुवाउँदा वडा नम्बर १२ की ३५ वर्षीया प्रीति थापाको मृत्युपछि आफन्तहरूले जिल्ला प्रहरी कार्यालय घेराउ गरेका हुन्।

कैलाली प्रहरीका अनुसार अस्पताल लाइनमा रहेको उक्त क्लिनिकमा बिहिवार बिहान थापा गर्भपतन (क्यूरेट) गर्न गएकी थिइन्। उनलाई क्लिनिकले औषधी दिएको थियो। औषधी सेवनपछि उच्च रक्तस्राव हुन गई महिलालाई सेती अस्पताल लगिएको थियो। त्यहाँ उनको उपचारकै क्रममा मृत्यु भएको बताइएको छ। मेडिकल सञ्चालक मध्येका एक जना गोदावरी नगरपालिका २ बस्ने २५ बर्षिय विनोद जोशीलाई प्रहरीले पक्राउ गरेको छ।

प्रीति थापाको मृत्युपछि फरार भएका सञ्चालक जोशीलाई प्रहरीले नियन्त्रणमा लिएर अनुसन्धान भइरहेको जिल्ला प्रहरी कार्यालय कैलालीका प्रहरी निरीक्षक कुलदिप चन्दले बताए। औषधी सञ्चालकको वैधानिकता के हो ? उसको लापरबाही हो होइन, भन्ने लगायत विषयमा पीडितहरूले जान्न चाहेको चन्दले बताए।घटनापछि मृतकका आफन्तले क्लिनिकले जथाभाबी औषधि दिएपछि महिलाको मृत्यु भएको आरोप लगाएका छन्।

उनीहरू मृतक प्रीतिलाई न्याय माग्दै आन्दोलनमा उत्रिएका छन्,उनीहरूले प्रहरी कार्यालय अगाडी विरोध गर्दै सडक समेत अवरुद्ध गरेका छन्। दोषीलाई कारबाहीको माग गर्दै क्षतिपूर्तिको माग समेत गरेका छन् ।