धनगढी- डिभिजन वन कार्यालय धनगढीका प्रमुख रामचन्द्र कँडेलले जिम्मेवारी सम्हालेका छन् । डिभिजन वन कार्यालय डोटीबाट सुरुवा भई आएका कँडेलले मंगलबारबाट डिभिजन वन कार्यालय धनगढीको प्रमुखको जिम्मेवारी सम्हालेका हुन्।
सोमबार र मंगलबार प्रमुख कँडेललाई कैलालीका वन अधिकार सरोकारवाला, सामुदायिक वन उपभोक्ता राष्ट्रिय महासंघ, बाह्रवन साझेदारी वन उपभोक्ता समिति, भारताल साझेदारी वन उपभोक्ता समिति र गौरीगंगा साझेदारी वन उपभोक्ता समितिले संयुक्त रूपमा स्वागत गरेका हुन्। यसअघि पनि कँडेलले डिभिजन वन कार्यालय धनगढीको प्रमुखको जिम्मेवारी सम्हाली सकेका छन्।
भेटमा वनका अधिकारकर्मीले कैलाली सामुदायिक, साझेदारी वनमा अहिले काम ठप्प भएको भन्दै चलायमान बनाउनुपर्ने सुझाव दिएको सामुदायिक वन उपभोक्ता राष्ट्रिय महासंघका केन्द्रीय महासचिव डण्डीराज सुबेदीले जानकारी दिए।
स्वागत कार्यक्रम पछि प्रतिकृया दिँदै डिभिजन वन प्रमुख कँडेलले कैलालीमा रहेका सामुदायिक वनमा रहेका विषयमा अध्ययन भैरहेको र त्यसलाई कहाँ अड्केको छ त्यसलाई नीतिगत रूपमा फुकाउने काम गर्ने बताएका थिए।
स्वागत कार्यक्रममा सामुदायिक वन उपभोक्ता राष्ट्रिय महासंघका केन्द्रीय महासचिव डण्डीराज सुबेदी, बाह्रवन साझेदारी वन उपभोक्ता समितिका ठक्कर शाही, भारताल साझेदारी वन उपभोक्ता समितिका संयोजक यादव भण्डारी, गौरीगंगा साझेदारी वन उपभोक्ता समितिका अर्जुन सापकोटा र सामुदायिक वन उपभोक्ता महासंघ कैलालीका अध्यक्ष विक्रम कुँवरको सहभागिता रहेको थियो।
