धनगढी- नेपाली काँग्रेसका सहमहामन्त्री तथा नेता महेन्द्र यादवमाथि कुटपिट गर्ने व्यक्तिलाई कडा भन्दा कडा कारबाहीको माग गर्दै नेपाल तरुण दल कैलाली समितिले प्रधानमन्त्री र प्रमुख जिल्ला अधिकारीलाई ज्ञापन पत्र बुझाएका छन् ।
शुक्रवार जिल्ला प्रशासन कार्यालयमार्फत तरुण दलले कुटपिट गर्ने व्यक्तिलाई कारबाहीको माग गर्दै ज्ञापन पत्र बुझाएका हुन्। नेपाल तरुण दलका कार्यवाहक अध्यक्ष निराजन खडकाले प्रमुख जिल्ला अधिकारी युवराज कटेललाई ज्ञापन पत्र बुझाएका थिए ।
नेता यादवमाथि काठमाण्डौंको भृकुटीमण्डपमा रहेको रिपोर्टस क्लबको कार्यक्रममा सहभागी भएर बाहिरिने क्रममा भदौ २० गते दिउँसो खुकुरी प्रहार भएको थियो ।
‘नेता यादवमाथि आक्रमण गर्ने व्यक्ति, समूह जो भए पनि तत्काल कानुनी कारबाहीकालागि नेपाल सरकारसँग माग गर्दै यो घटनाको गम्भीर अनुसन्धान गरी यथार्थता सार्वजनिक गर्न अनुरोध गर्दछौँ’ ज्ञापन पत्रमा भनिएको छ ।
साथै यस्ता घटनाले आम नागरिकमा असुरक्षा, राज्यमा दण्डहीनता र अराजकताले प्रसय पाउने खतरा बढेकाले शान्ति सुरक्षाको प्रत्याभूति हुने वातावरण तयार गर्न तरुण दलका अध्यक्ष खडकाले अनुरोध गरे ।
नेता यादव नेपाल तरुण दलका पूर्व अध्यक्ष तथा नेपाल सरकारका पूर्व खानेपानी मन्त्री हुन् । ज्ञापन पत्र बुझाउन तरुण दलका केन्द्रीय सदस्य लोकबहादुर खडका (रवि), अमृत बिसीसाथै तरुण दलका नेताहरूको सहभागिता रहेको थियो ।
