नरेन्द्र रावल/अछाम- अछामको मंगलसेन लुगाडा रामारोशन पर्यटकीय सडकको निर्माण कार्य अन्तिम चरणमा पुगेको छ । प्रदेश सरकार अन्तरगत पूर्वाधार विकास कार्यालय अछामको आयोजना तथा रोयल कन्स्ट्रक्सन धनगढीले निर्माण गरिरहेको उक्त सडकको १२ किलोमिटर ग्राभेल कार्य सकिएको आयोजनाले जनाएको छ ।
सुदूरपश्चिम सरकारको १३ करोड ९ लाख ७४ हजार चार सय ३२ रुपैयाँ लागतमा निर्माण भइरहेको सडकको चौडाइ साढे पाँच मिटर रहेको छ भने लम्बाई १२ किलोमिटर रहेको छ । २०७९ असार ६ गते सम्झौता भई निर्माण कार्य थालनी गरेको निर्माण कम्पनीले २०८१ असार १५ मा सम्पन्न गर्ने सम्झौता भएपछि उक्त सडकको निर्माण कार्यमा तीव्रता दिएको हो ।
विगत वर्षमा सडकको जोखिमपूर्ण यात्रालाई सम्झिँदै हाल सडक निर्माण कार्यको स्तरोन्नति सहित यस सडकमा आएको सुधार देखेर आफूहरू हर्षित बनेको मंगलसेन–१० जुपुका मिट्ठु विकले बताए ।मंगलसेन–लुगाडारामारोशन पर्यटकीय सडकको काम अन्तिम चरणमा पुगेको र सडकमा साइन बोर्ड हालेर पेन्ट गर्ने अवस्थामा पुगेको निर्माण कम्पनीका प्रोजेक्ट म्यानेजर प्रमोद पन्तले बताए ।
यस सडकमा ३ हजार ७ सय घन मिटर पलम वाल, एक हजार घन मिटर क्याबिन वाल, छ सय घन मिटर स्टोन मेसिनरी वाल लगायत डेलिनेटर पोष्ट निर्माण गरिएको उनको भनाई छ । हाल मंगलसेन देखी खिमाडा सम्मको १२ किलोमिटर सडक ग्राभेल बने पनि मंगलसेन ओलिगाँउ, लुगाडा, कालागाँउ, रामारोशन सडक २२ किलोमिटर स्तरोन्नति हुनुपर्ने स्थानीयले माग गरेका छन् ।
