धनगढी । दशैँ,तिहार,छठ लक्षित विशेष सुरक्षा योजनामा सुदूरपश्चिम प्रदेशभरी चार हजार ७१ जना प्रहरी परिचालन गरिने भएको छ ।
सो समयमा हुन सक्ने सम्भावित अपराधिक कृयाकलाप नियन्त्रणका लागि सुदूरपश्चिम प्रदेश प्रहरी कार्यालयले प्रदेशभरी सो संख्याका प्रहरी परिचालन गर्ने भएको हो ।
अपराधिक कृयाकलाप नियन्त्रणका लागि कार्यालय रिजर्भ १९, स्टाईपिङ्ग १७,पिकेट १६६ स्थान, पैदल र साईकल गस्ती १६२,मोबाईल गस्ती ८१,क्युआरटी ४२ वटा रहने प्रदेश प्रहरी कार्यालय प्रमुख प्रहरी नायव महानिरीक्षक भरतबहादुर बोहराले निशाना न्युजलाई जानकारी दिए ।
‘दशैँ तिहारमा विदेशमा भएका नागरिक घर आउँदा नगद,सुन चादी गरगहना ल्यायर आउन गर्छन् त्यो बेला लुटपाट हुने अवस्था हुन सक्छ,समाजमा जुवा तास मदिरा सेवन जस्ता कुरा हुन्छन्’ उनले भने ‘यसलाई चुनौतिका रुपमा लिएका छौँ,यसलाई नियन्त्रणका लागि विभिन्न ठाउँमा ड्युटी,गस्ती,सादा पोषाकका प्रहरी परिचालन हुन्छन्’ ।
आर्थिक कारोबार हुने,बित्तीय संस्था,बैकहरुमा बिशेष निगरानी राख्न मातहत जिल्ला प्रहरी कार्यालयहरुलाई निर्देशन समेत दिइसकेको प्रहरी नायव महानिरीक्षक बोहराले बताए ।
नागरिक सहायता कक्ष स्थापना,बसमा जाने यात्रुका लागि सचेतना मुलक जिङ्गल बजाउने कार्य पनि गरिने उनको भनाइ छ । त्यस्तै संबेदनशील क्षेत्रहरुमा डग स्क्यानिङ गरिने उनले बताए । त्यसैगरी विशेष शुरक्षा योजना प्रभावकारी कार्यान्वयनको लागि प्रदेश प्रहरी कार्यालयले आफ्ना मातहतका नौ वटै जिल्ला प्रहरी कार्यालयलाई निर्देशन दिने तयारीमा रहेको बोहराले बताए ।
