धनगढी- सुदूरपश्चिम प्रदेशका उद्योग पर्यटन वन तथा वातावरण मन्त्री रमेशसिंह धामीले प्रदेश सरकारले एक स्थानीय एक पर्यटन गन्तव्यको नीति लिएको बताएका छन् । मन्त्री धामीले आन्तरिक र बाह्य पर्यटकलाई लक्षित गरी प्रदेश सरकारले स्थानीय सरकारसंगको सहकार्यमा प्रत्येक स्थानीय तहमा एउटा नमुना पर्यटन गन्तव्य बनाउने बताएका हुन् । विश्व पर्यटन वर्ष २०८० को अवसर पारेर दार्चुलाको अपिहिमाल गाउँपालिकाबाट यो कार्य शुरुवात भएको बताए ।
थारुवान खबर त्रैमासिक पत्रिकाले आइतबार कैलालीको बौनियामा आयोजना गरेको ‘सूचना तथा सञ्चार र राजनीतिमा थारु वर्गको सहभागिता, पहुँच विषयक अन्तरक्रिया उद्घाटन गर्दै मन्त्री धामीले प्रदेश सरकारले पाँच वर्षमा प्रत्येक स्थानीय तहमा एउटा पर्यटन गन्तव्य विकास गर्न स्थानीय तहलाई सहयोग गर्ने बताए ।
उनले भने पर्यटन क्षेत्र भनेको रोजगारी र आय आर्जनसँग जोेडिएको क्षेत्र हो, आन्तरिक र बाह्य पर्यटकका लागि प्रत्येक स्थानीय तहमा एउटा पर्यटकीय गन्तव्य बनाउने मेरो लक्ष्य छ । पर्यटन क्षेत्रलाई उद्योग कै रुपमा विकास गर्न सकिने उनको भनाइ छ । स्थानीय कच्चा पदार्थमा आधारित उद्योगलाई आफूले प्राथमितामा राखेको बताउँदै मन्त्री धामीले प्रदेश सरकारले प्रत्येक जिल्लामा एउटा उद्योग सञ्चालन गर्न बजेट विनियोजन गरेको बताए ।
यसैगरी, राष्ट्रिय सभा सदस्य तथा नेकपा माओवादी केन्द्रका प्रदेश अध्यक्ष हरिराम चौधरी उत्सवले थारु समुदायको सूचना, सञ्चार र राजनीतिमा पहुँच बढाउन आवश्यक रहेको बताए । उनले हरेक तरिकाले थारु समुदाय सूचना, सञ्चार र राजनीतिमा पहुँच नपुगेको कारण यस समुदायको समुन्नत विकास हुन नसकेको बताए ।
मुलुकको भविष्य राजनीतिकज्ञले प्लान गर्ने भएको हुनाले थारु समुदायको मानिस पनि राजनीतिसंग जोडिन आवश्यक रहेको बताए । उनले माओवादी जनयुद्धपछि नेपालमा गणतन्त्र आउछ भन्ने प्लान माओवादी पार्टीका अध्यक्ष पुष्पकमल दहालले गरेको बताए । अध्यक्ष उत्सवले पार्टी र जनवर्गीय संगठनहरुले गरिरहेको क्रियाकलापलाई डकुमेन्टेशन गर्न, पार्टीको मिशन, भिजन र प्लान नागरिकलाई बुझाउन हरेक क्षेत्रमा कार्यरत सबैले लेख लेख्न जरुरी रहेको बताए ।
नेकपा माओवादी केन्द्रका कैलाली जिल्ला अध्यक्ष लाजुराम चौधरी अंकितले अघिल्लो पुस्ताले अहिलेको पुस्तालाई माओवादी केन्द्रले जनयुद्ध र त्यसको उपलब्धीको विषयमा बुझाउन नसकेको बताए । उनले अवका युवाहरुलाई जागरण गर्न, माओवादी जनयुद्ध र त्यसको उपलब्धीको विषयमा बुझाउन लेख लेख्ने र प्रकाशन गर्ने वानी बसाल्न जरुरी रहेको बताए ।
कार्यक्रममा थारुवान खबरका सम्पादक तिलक चौधरीले पत्रिका प्रकाशनको तयारी भइरहेको बताए । उनले आउँदो महिनादेखि पत्रिका त्रैमासिक रुपमा प्रकाशन हुने बताए । पत्रिका थारु, नेपाली र अंग्रेजी गरी तीन भाषामा प्रकाशित हुने गरी जिल्ला प्रशासन कार्यालय कैलालीमा दर्ता भएको छ ।
कार्यक्रममा कैलाली, कञ्चनपुर र बर्दियाबाट नगरप्रमुख, गाउँपालिका अध्यक्ष, उपाध्यक्ष, वडाध्यक्ष, लगायतका जनप्रतिनिधि, युवा र पत्रकारहरुको सहभागिता थियो । कार्यक्रममा पत्रकारिताको विषयमा प्रेस सेन्टर नेपालका केन्द्रीय सदस्य मुकेश टेंर्राले प्रस्तुती गरेका थिए ।
