घोडाघोडी- कैलालीको घोडाघोडी नगरपालिका–४ स्थित माघी होमस्टे पाहुनाको पर्खाइमा रहेको छ । सडक, यातायात, खानेपानीको असुविधादेखि लिएर सुरक्षाको कमीका कारण अपेक्षा अनुसार होमस्टे फस्टाउन सकेको छैन् ।

कला, संस्कृतिको संरक्षण गर्ने र धेरैभन्दा धेरै आन्तरिक तथा बाह्य पर्यटक भित्र्याउने लक्ष्यका साथ सो गाउँमा होमस्टे सुरु गरिएको थियो । अहिले सो गाउँका १५ घरमा होमस्टे सुरु गरिएको छ । थारु बाहुल रहेको माघी गाउँका अरु घर परिवारमा होमस्टेमा आकर्षण देखिएको छैन ।

होमस्टे सञ्चालन गरिएका घरमा अपेक्षाकृत पाहुना पाउन नसकेपछि अरू परिवारको यसप्रति आकर्षण बढ्न नसकेको स्थानीय बालकुमार चौधरीले बताए । होमस्टे अपेक्षाकृत फस्टाउन नसक्नुमा समय अनुसार सुविधा थप गर्न नसक्नु देखिएको छ ।

कैलालीको सुख्खड बजार नजिक रहेको माघी होमस्टे थारु गाउँघरमै उत्पादित अर्गानिक खानेकुरा न्यून शुल्कसहित थारु स्वाद प्राप्त गर्न सकिने होमस्टे सञ्चालकको भनाई छ । सुख्खड बजारदेखि ६ किलोमिटर दूरीमा रहेको थारु होमस्टे माघी गाउँमा १५ घरमा होमस्टे सञ्चालनमा छ । हरेक घरमा दुई कोठा र चार वेडको व्यवस्था रहेको होमस्टेले एक रातमा ६४ जनालाई आश्रय दिनसक्ने व्यवस्था रहेको होमस्टे सञ्चालक महेश चौधरीले बताए ।

होमस्टेमा आकर्षण र पाहुना स्वागतका लागि थारु सांस्कृतिक कार्यक्रम देखाउने व्यवस्था छ । थारु झुम्रा, सखिया र लठ्ठी नाचको व्यवस्था रहेको छ । थारु घरमा होमस्टे सञ्चालन रहेकाले थारु खेतबारीमा उत्पादित अर्गानिक तरकारी र खाद्यान्नको स्वाद लिन पाइन्छ ।

होमस्टेमा आउने पाहुनाका लागि विशुद्ध गाउँमै उत्पादित खाद्यान्न सागम्री र मासुजन्य वस्तुको उत्पादन पर्याप्त रहेको होमस्टे सञ्चालकले बताएका छन् ।

२०७१ देखि शूरुभएको होमस्टेमा आउने पाहुनालाई प्रति कोठा शुल्क ४ सय तय गरिएको छ । त्यसमा दुई बेडको व्यवस्था छ । त्यस्तै खाना सादा १५० र मासुखाना २०० देखि २५० सम्म शुल्क निर्धारण गरिएको छ ।

होमस्टेदेखि घोडाघोडी ताल जम्मा ३ किमी दूरीमा छ । होमस्टेमा प्रायः अनुसन्धानकर्ता, अवलोकनकर्ता र आन्तरिक एवम् बाह्य पर्यटक आउने गरेको चौधरीले बताए । होमस्टेमा विजुलीबत्ती, खानेपानी इन्टरनेट सुविधा रहेको तालिम कक्षको समेत व्यवस्था रहेको जनाइएको छ ।