धनगढी- कैलालीको धनगढीमा भ्रष्टाचार नियन्त्रण तथा सुशासन प्रवर्द्धन सम्बन्धी प्रदेशस्तरीय अन्तरक्रिया कार्यक्रम सम्पन्न भएको छ ।आयुक्त डा. हरि पौडेलको अध्यक्षता र सुदूरपश्चिम प्रदेशका भौतिक पूर्वाधार विकास मन्त्री प्रकाश बहादुर देउवाको प्रमुख आतिथ्यमा बुधवार उक्त अन्तरक्रिया सम्पन्न भएको अख्तियार दुरुपयोग अनुसन्धान आयोगले जनाएको छ ।
कार्यक्रममा सुदूर पश्चिम प्रदेशका प्रमुख सचिव डा हरि लम्सालले सुशासन प्रवर्द्धन एवम् भ्रष्टाचार नियन्त्रणका लागि सार्वजनिक पद धारण गरेका व्यक्तिहरूले सार्वजनिक जबाफदेहिता वहन गर्दै कानुन सम्मत ढङ्गले कार्यसम्पादन गर्नुपर्ने विषयलाई जोड दिए ।
यस्तै प्रदेश मन्त्री देउवाले भ्रष्टाचार नियन्त्रण गर्न सबैको साझा अभिभारा भएको भन्दै सुशासन प्रवर्द्धन गर्न अख्तियार दुरुपयोग अनुसन्धान आयोगको भूमिका उल्लेखनीय रहेको बताए । उनले प्रदेश सरकारले सुशासन प्रवर्द्धन गर्न भ्रष्टाचार विरुद्ध शून्य सहनशीलताको नीति लिएको विषय व्यक्त गरे ।
यस्तै आर्थिक मामिला तथा योजना मन्त्री नरेश कुमार शाहीले जिम्मेवार र नयाँ सोच सहितको नागरिक समाज, निःस्वार्थी र समर्पित राजनीतिज्ञ तथा सकारात्मक र कर्मयोगी कर्मचारीतन्त्रको सहकार्यबाट सुशासन कायम राख्न सकिने बताए ।
सहभागीहरूले राखेको जिज्ञासालाई एकमुष्ट रूपमा सम्बोधन गर्दै आयोगका आयुक्त डा हरि पौडेलले भ्रष्टाचार नियन्त्रण गर्न सबैको साझा प्रतिबद्धता आवश्यक हुने बताए । उनले निजी लाभ र स्वार्थमा नपरी सार्वजनिक हितका लागि काम गरेमा सुशासन प्रवर्द्धन हुने बताए ।
कार्यक्रममा अख्तियार दुरुपयोग अनुसन्धान आयोगको कार्यालय, कञ्चनपुरका कार्यालय प्रमुख सहसचिव रमेश कुमार केसीले सहभागीहरूलाई स्वागत गर्दै कार्यपत्र प्रस्तुत गरेका थिए ।
साथै, अख्तियार दुरुपयोग अनुसन्धान आयोगका सहसचिव ईश्वरी प्रसाद अर्यालले आयोगको समग्र विवरण सहितको कार्यपत्र प्रस्तुत गरेको प्रवक्ता नरहरि घिमिरेले जारी गरेको विज्ञप्तिमा उल्लेख छ ।
