काठमाडौँ- सर्वोच्च अदालतले बाजुराका एमाले नेता चेतन अयडीको हत्या घटनाका अभियुक्तहरूलाई साधारण तारेखमा छोड्न आदेश गरेको छ । बिहीबार सर्वोच्च अदालतले यसअघि जिल्ला र उच्च अदालतको आदेश उल्ट्याउँदै उनीहरूलाई साधारण तारखेमा छोडेर मुद्दाको पुर्पक्ष गर्न आदेश गरेको हो ।
गत वर्ष मंसिर ४ गते आम निर्वाचनका दिन बाजुराको त्रिवेणीमा अयडीको वीभत्स हत्या भएको थियो । अयडीको हत्यामा संलग्न भएको भन्दै मृतकका परिवारले दिएको जाहेरी अनुसार प्रहरीले सोही ठाउँका जुद्धबहादुर अयडी, चक्रबहादुर अयडी, विनोदबहादुर अयडी, भूपाल अयडी, रनसिंह बहादुर अयडी र रूपा चौधरी अयडीलगायतविरुद्ध कर्तव्य ज्यानको मुद्दा चलाएको थियो ।
जिल्ला र उच्च अदालतले पुर्पक्षका लागि थुनामा पठाएपछि अभियुक्त पक्षले सर्वोच्चमा निवेदन दिएका थिए । सोही निवेदनका आधारमा सर्वोच्चले जिल्ला र उच्चको आदेश बदर गर्दै साधारण तारेखमा राखी पुर्पक्ष गर्न भनेको हो ।
अयडी अनेरास्ववियुका केन्द्रीय सचिवालय सदस्य तथा सुदूरपश्चिम विश्वविद्यालयका अध्यक्षसमेत थिए । मुद्दाबारे सर्वोच्च अदालतको आदेशमा एमाले नेताहरूले आपत्ति जनाएका छन् । एमालेको विद्यार्थी संगठन अनेरास्ववियुका अध्यक्ष समिक बडालले त न्यायाधीशलाई उनबै शब्दमा ुज्यानमाराु भनेका छन् । उनले सर्वोच्चको यो आदेशविरुद्ध अनेरास्ववियुले जन अदालतमा उत्रिनुपर्ने सार्वजनिक अपिल गरेका छन् ।
