झलारी- कञ्चनपुरको शुक्लाफाँटा नगरपालिका–८ का स्थानीयले ग्राभेलसहितको ट्याक्टर नियन्त्रणमा लिएर प्रहरीको जिम्मा लगाएका छन्। शुक्रवार साँझ से १ त ६५५८ र सुपप्र ०२–००१ त १२६५ नम्बरको ट्याक्टर ग्राभेलसहित समातिएको हो। अनौखी खोलाबाट अवैध उत्खनन् गरेको भन्दै स्थानीयले ट्याक्टरलाई नियन्त्रणमा लिएर प्रहरीलाई बुझाएका थिए।
ट्याक्टर झलारीका लोकेन्द्रबहादुर महराको भएको बुझिएको छ। ट्याक्टरलाई महाकाली सिचाई योजना निर्माण कम्पनी वेस्टर्न डेभल्पमेन्ट कन्सट्रक्सनले भाडामा लिएको थियो।
एक महिनाका लागि ट्याक्टर भाडामा लिएको कम्पनीका इन्जिनियर कृष्ण ओलीले बताए। ‘आरपी हार्डवेयर एण्ड सप्लायर्ससंग एक महिनाका लागि ट्याक्टर भाडामा लिएका छौँ,’ उनले भने, ‘हिजो ग्राभेलको स्याम्पल जाँचका लागि लग्दै गर्दा स्थानीयले समातेका हुन्।’
शुक्लाफाँटाका नदी खोलामा अवैध रूपमा नदीजन्य पदार्थको चोरी तस्करी बढेको स्थानीयले बताएका छन्। अवैध उत्खनन् गर्ने ट्याक्टरलाई कारबाही गर्नुपर्ने स्थानीय टेक साउँदले बताए।
नगरपालिकाले अवैध उत्खनन् गर्ने ट्याक्टरलाई जरिवाना गर्दै आएको छ। नदीजन्य पदार्थको उत्खननमा नगरपालिकाले रोक लगाएको छ। नदीजन्य पदार्थको उत्खननका लागि नगरपालिकाले ठेक्का आह्वान समेत गरेको छ।
