धनगढी- कैलाली उद्योग वाणिज्य संघले जिल्ला प्रशासन कार्यालय कैलालीमा सरुवा भएर आएका नयाँ प्रमुख जिल्ला अधिकारीलाई स्वागत गरेको छ । संघले धनगढीमा बुधवार आफनै कार्यालयमा स्वागत तथा भेटघाट कार्यक्रमको आयोजना गर्दै सरुवा भएर आएका नयाँ प्रमुख जिल्ला अधिकारी धर्मेन्द्रकुमार मिश्रलाई स्वागत गरेको हो ।
कैलाली उद्योग वाणिज्य संघका अध्यक्ष पुष्पराज कुँवरले प्रमुख जिल्ला अधिकारी मिश्रलाई माला र खादाले स्वागत गरेका थिए । स्वागतपछि बोल्दै प्रमुख जिल्ला अधिकारी मिश्रले जिल्लाको शान्ति सुरक्षाका लागि आफू कटिबद्ध भएर लाग्ने बताए ।
खुल्ला सिमानाकाका कारण जिल्लामा धेरै चोरी पैठारी भएकाले साना ठुला जुन सुकै व्यापारी भएपनि आफूले पक्राउ गर्न नछोडने उनले बताए । उनले लागु औषध नियन्त्रणका लागि गृह मन्त्रालयसँग मौखिक सल्लाह भएकाले नियन्त्रणका लागि कडाइका साथ लाग्ने बताए ।
निजी क्षेत्रका समस्या र चुनौतीका विषयमा आफूलाई अवगत भएकाले कानुनमा टेकेर के गर्न सकिन्छ त्यस तर्फ आफूले काम गर्ने उनले बताए । उनले निजी क्षेत्रसँग समन्वय गरेर अगाडि बढ्न तयार रहेको उनको भनाइ छ । उनले सीमा क्षेत्रको पनि अनुगमन गरेकाले थप सुरक्षा व्यवस्था कडा पारिएको उनले बताए ।
संघका अध्यक्ष पुष्पराज कुँवरले सरुवा भएर आएका प्रमुख जिल्ला अधिकारी मिश्र लाई स्वागत सँगै सफल कार्यकालको शुभकामना दिए । निजी क्षेत्र पनि प्रशासनसँग समन्वय गरेर आगामी दिनमा अगाडि बढ्न तयार रहेको उनले बताए ।
त्यस्तै संघले भर्खर मात्रै नाडा अटोमोबाईल्स एशोसिएसन अफ़ नेपालको ४७ औँ साधारण सभाबाट नाडा केन्द्रीय कार्यसमितिको संस्थागत उपाध्यक्ष पदमा निर्वाचित पुष्करराज ओझालाई सम्मान समेत गरेको थियो । ओझा कैलाली उद्योग वाणिज्य संघका वरिष्ठ उपाध्यक्ष समेत हुन् ।
