धनगढी– कैलालीको अत्तरियामा जारी सुदूरपश्चिम प्रादेशिक महोत्सवमा ‘थारुगाउँ’ प्रदर्शनी स्थल राखिएको छ । अत्तरिया उद्योग वाणिज्य संघद्वारा सञ्चालित महोत्सवमा थारु संग्रहालयसहितको छुट्टै ‘थारुगाउँ’ प्रदर्शनी स्थल राखिएको हो । थारुगाउँ प्रदर्शनीले थारु संस्कृति,कला,परम्पराको बारेमा पछिल्ला पुस्तालाई अवगत हुने प्रदर्शनी व्यवस्थापन संयोजक हेमन्त चौधरीले बताए ।
‘पछिल्लो समयमा हाम्रो परम्परागत थारु संस्कृति लोप हुने अवस्थामा पुगेको छ । पछिल्ला पुस्तालाई हाम्रो संस्कृतिको बारेमा जानकारी छैन् ।’ उनले भने ‘थारुगाउँ प्रदर्शनीले संस्कृति संरक्षण, प्रवद्र्धनकासाथै नयाँ पुस्तामा यसबारे जानकारी हुने विश्वास लिएका छौँ ।’ उनले भने ‘यसबाट थारु जातिसँगै अन्य जातिका मान्छेले पनि हाम्रो रहन सहन, कला, संस्कृति, खानपानको बारेमा बुझ्न र देख्न पाउने छन् ।’
थारुगाउँ प्रदर्शनी स्थलले साच्चिकै थारुगाउँको झल्को दिने उनको भनाइ थियो । त्यहाँ राखिएको संग्रहालयमा थारु संस्कृति झल्किने विभिन्न सामग्रीहरु राखिएका छन् । संग्रहालयमा ढकिया, गाडा, मन्दरा (मादल),डोली,डोला,जाल,हेल्का (माछा मार्ने साधन),डिलिया (माछा राख्ने भाँडो) ढिकी,पिर्का,ढोकनी,लेहङ्गा, चोलीलगायतका सामानहरु राखिएको संयोजक चौधरीले बताए ।
त्यस्तै थारु पहिरनका गरगहना मगौरा, टीक,टउक,,कन्सेहरी, झुम्कालगायतका साम्रगीहरु संग्रहालयमा अवलोकन गर्न पाइने उनले बताए । यससँगै हरेक दिन प्रदर्शनी स्थलमा परम्परागतदेखि आधुनिक थारु नृत्य,गीत प्रस्तुत गरिने जनाइएको छ । प्रदर्शनी स्थलमा थारु मौलिक परिकार पाइने स्टलहरु पनि राखिएका छन् ।
छुट्टै पहिचान बोकेको थारु संस्कृति संरक्षणका लागि ‘थारुगाउँ’ प्रदर्शनी स्थल राखिएको अत्तरिया उद्योग वाणिज्य संघका अध्यक्ष कल्याणसिंह बोहराले बताए । ‘थारु समुदायको आफ्नै कला,संस्कृति छ । खानपान,रहन सहन छ ।” उनले भने ‘त्यसलाई पनि जोगाउनु पर्छ भन्ने हाम्रो उदेश्य हो ।’ पुस २६ गते बाट सञ्चालित महोत्सव माघ ७ गतेसम्म सञ्चालन हुने अत्तरिया उद्योग वाणिज्य संघले जनाएको छ ।
