धनगढी- नागरिक उन्मुक्ति पार्टी (नाउपा) ले संस्थापक अध्यक्ष रञ्जिता श्रेष्ठलाई सहअध्यक्षमा मनोनीत गर्ने निर्णय गरेको छ ।
टीकापुरमा शनिवार सम्पन्न पार्टीको प्रथम महाधिवेशनले रञ्जितालाई सहअध्यक्षमा मनोनीत गर्ने निर्णय गरेको सो पार्टीले जनाएको छ ।
उक्त महाधिवेशनबाट पार्टीका संरक्षक रेशम चौधरी अध्यक्षमा निर्वाचित भएपछि बसेको पहिलो बैठकले विधान संशोधन गर्दै रञ्जितालाई सहअध्यक्षमा मनोनीत गर्ने निर्णय गरेको हो ।
रञ्जिता रेशम चौधरीकी श्रीमती हुन् । यस्तै नाउपाले विधान संशोधन गरी दुई जना महासचिव हुने व्यवस्थासमेत गरेको छ । टीकापुर घटनामा रेशम जेल परेपछि पार्टीको अध्यक्ष उनकी पत्नी रञ्जिता भएकी थिइन् ।
कैलालीको टीकापुरमा थरुहट र अखण्ड सुदूरपश्चिमको आन्दोलनका क्रममा टीकापुर घटना भएको थियो । सो घटनाको योजनाकार भएको आरोप लागेपछि उनले भूमिगत अवस्थामै २०७४ को चुनाव कैलाली १ बाट जित्न सफल भए ।
जिल्ला अदालत कैलालीले २०७५ मा जन्मकैदको सजाय सुनायो । टीकापुर घटनामा ८ प्रहरी र १ नाबालक मृत्युको घटनाको योजनाकारको रुपमा चौधरीलाई अदालतले जन्मकैदको सजाय सुनाएको थियो । उच्च अदालत दिपायलले दुई वर्षपछि जिल्लाको सजायलाई सदर गर्यो ।
५ वर्ष तीन महिना जेल बसे पनि गणतन्त्र दिवसमा राष्ट्रपतिबाट आममाफी पाएपछि चौधरी गत जेठ १५ गते रिहा भएका थिए । उनी झण्डै १५ वर्ष जेल सजाय छुट पाउन सफल भए ।
