कैलाली- सुदूरपश्चिम प्रदेश सरकारका सामाजिक विकासमन्त्री झपटबहादुर साउँदले कला संस्कृति बिनाको मानव अपूर्ण हुने बताएका छन् । नयाँ वर्षको रुपमा थारु चौधरी समुदायले मनाउँदै आएको माघ पर्वको अवसरमा कञ्चनपुरको कृष्णपुरमा आयोजित माघी मिलन कार्यक्रमको आईतबार उद्घाटन गर्दै मन्त्री साउँदले पहिचानका लागि पनि उसले अपनाउने कला संस्कृतिको जगेर्ना आवश्यक रहेको बताएका हुन् ।
मानव जातिको विकासक्रमसँगैदेखि उसले सिकेको कला र अपनाउन थालेको सभ्यता र संस्कृतिको जगेर्ना गर्न सकेमात्रै हामी पनि मानव कहलाउने भएकाले परम्परादेखिका सकारात्मक प्रचलनलाई आत्मसाथ गर्नुपर्नेमा उनले जोड दिए ।
विभिन्न प्राकृतिक प्रकोपसँग जुझ्दै नेपालको पश्चिम तराईमा बस्ती विस्तार गर्ने थारु समुदाय यहाँको धर्ती पुत्र हो । मानव सभ्यतासँगै उसले अपनाएका कला संस्कृतिको जगेर्ना हाम्रो पहिलो प्राथमिता रहने भन्दै मन्त्री साउँदले भने, ‘यो समुदायको पहिचान बचाउन र कला संस्कृतिको जगेर्नामा प्रदेश सरकारको सामाजिक विकास मन्त्रालय लागि पर्नेछ, मन्त्रीको हैसियतले म प्रतिबद्धता गर्दछु ।’ समाजमा विद्यमान कला संस्कृतिले हामीलाई एकतामा बाँधेको उनको विश्वास छ ।
कार्यक्रममा यस क्षेत्रबाट प्रदेशसभा सदस्य ओमप्रकाश भाट (सरल), माओवादी केन्द्रका केन्द्रीय सदस्य देबीलाल चौधरीले र स्थानीय जनप्रतिनिधिहरुले थारु भाषामै माघ पर्वको शुभकामना व्यक्त गर्दै कृष्णपुरको समग्र विकासमा स्थानीय बासिन्दासँगै रहने प्रतिबद्धता गरे ।
