धनगढी- सुदूरपश्चिम प्रदेशका उद्योग, पर्यटन, वन तथा वातारण मन्त्री रमेशसिंह धामीले सबै नागरिकलाई शुद्ध खानेपानीको व्यवस्था गर्ने उदेश्य लिएर प्रदेश सरकार अगाडि बढिरहेको बताएका छन् ।बताएका छन् । शनिबार कैलालीको धनगढी उपमहानगरपालिका–१३ श्रीलङ्कास्थित गेटा ७ खानेपानीको उद्घाटन तथा खानेपानी उप सरसफाई समितिको तेस्रो साधारणसभामा बोल्दै उनले यस्तो बताएका हुन् ।
कार्यक्रममा बोल्दै मन्त्री धामीले भने, ‘अझै सबै नागरिकलाई शुद्ध खानेपानीको व्यवस्था गर्न सकेका छैनौँ । यो पाँच वर्ष भित्र हामीले पूरा गर्नु पर्छ भन्ने उदेश्य लिएर अगाडि बढेका छौँ ।’ ‘पाँच वर्ष भित्र प्रदेशका नौवटै जिल्लाका जनतालाई शुद्ध खानेपानी हामीले कसरी दिन सक्छौँ भन्ने बहसको बिषय छ ।’ मन्त्री धामीले भने, ‘शुद्ध खानेपानीको व्यवस्था गर्नुपर्ने जिम्मेवारी हामीमा छ । यो जिम्मेवारी बोध गरेर त्यो अभियानमा हामी लागेका छौँ ।’
उनले भने, ‘शिक्षा,स्वास्थ्य,खानेपानी,विजुली सबै नागकिलाई सहज उपलब्ध गराउन पाए हुन्थ्यो भन्ने हाम्रो लक्ष्य छ । अहिलेपनि छलफल र बहस ल्याइनै रहेका छौँँ । यो विषयलाई आत्मसाथ गरेर जनतालाई सहज उपलब्ध गराउन हामी लाग्नै पर्छ ।’ यो सरकार जनताबाट निर्वाचित जनप्रतिनिधिको सरकार भएकाले जनताका हरेक समस्या सम्बोधन गर्न अगाडि बढ्ने उनको भनाइ थियो ।
