कैलाली- सुदूरपश्चिम प्रदेशका प्रदेश प्रमुख देवराज जोशीले सुदूरपश्चिम प्रदेश सम्भावनाको खानी भएको बताएका छन् । आइतवार कैलालीको लम्कीचुहा–३ बल्चौरमा रहेको कैलाशधाम तीर्थस्थल जगदगुरु आश्रममा आयोजित नेपाल महिमा युक्त श्रीमद्भागवत महापुराण एवं माघी धार्मिक महामहोत्सवको समापनका अवसरमा प्रदेश प्रमुख जोशीले सुदूरपश्चिम प्रदेश धार्मिक, आध्यात्मिक र पर्यटकीय सम्भावना बोकेको क्षेत्र भए पनि त्यसको उजागर हुन नसकेको उल्लेख गरे ।
“ऐतिहासिक जगद्गुरु अन्नत श्री विभूषित श्री बालसन्त मोहनशरण देवाचार्य महाराजको साधिन्यमा सुरु भएको माघी स्थान तथा माघी मेलाका कारण मैले कर्णाली नदीको महत्व बुझ्न पाएँ”, उनले भने । उनले मानसरोवरबाट बगेर आएको पवित्र कर्णाली नदी नै साक्षात् गङ्गामाता भएको बताए ।
नेपालका विभिन्न तीर्थस्थलको प्रचारप्रसारमा लागेकोमा प्रशंसा गर्दै प्रदेश प्रमुख जोशीले १२ वटा सहस्र ज्योर्तिलिङ्ग, पवित्र महाकाली र पवित्र मानस गङ्गा कर्णाली नेपालको सुदूरपश्चिमै छन् भनी प्रमाणित गरिदिनुभएकोमा जगद्गुरु अन्नत श्री विभूषित श्री बालसन्त मोहनशरण देवाचार्य महाराजलाई धन्यवाद दिए ।
‘सेती, भेरी, महाकाली, गण्डकी, कौशिनी अनि । पार्दछिन शुद्ध कर्णाली, जति पाप भएपनि’ भन्ने मूल श्लोकका साथ यही माघ १ गतेदेखि सुरु माघी स्थान तथा माघी मेलाको उद्घाटन सुदूरपश्चिम मुख्यमन्त्री कमलबहादुर शाहले धाममा स्थापना गरिएको विशाल नर्मदेश्वर स्वरुपा कैलाशपति महादेवको शिवलिङ्गको प्राण प्रतिष्ठा गर्दै सुरु गरेका थिए ।
माघी स्नान गर्न विभिन्न जिल्लाबाट हजारौँको सङ्ख्यामा श्रद्धालु भक्तजन कैलाशधाममा आएको धामका अध्यक्ष लक्ष्मीराम रिमालले बताए ।
जगदगुरु अन्नत श्री बिभुषित श्री बालसन्त मोहनशरण देवाचार्य महाराजले कर्णाली नदी शुद्ध र पवित्र नदी भएको बताए । यस नदीमा स्नान गरी व्रत गरेमा अन्य कुनै ठाउँको तीर्थव्रतको आवश्यकता नभएको उनको भनाइ थियो ।
मानसरोवरबाट उत्पत्ति भई हुम्ला, जुम्ला, बाजुरा, अछाम, कालिकोट, दैलेख, सुर्खेत हुँदै कैलालीसम्म पुगेको कर्णाली नदी कैलाशधाम तीर्थस्थल भएर बगिरहेको छ ।
कर्णाली नदीलाई मानस गङ्गाका रुपमा चिनाउन, जगद्गुरू महाराजश्रीले कर्णाली नदीमा सवा एक लाख गाईको दूधले अभिषेक गराई सवा एक करोड दीप प्रज्ज्वलन गर्नुभएको जगदगुरुका प्रवक्ता रहनुभएका सुदूरपश्चिम प्रदेशसभा सदस्य बिक्रमसिंह धामीले बताए ।
उनले “सुदूरपश्चिम प्रदेश देवः भूमि भएकाले यसको विकासको मूलमन्त्र नै धार्मिक पर्यटन रहेको हो । यसमा हामी सबै सुदूरपश्चिमवासी एकजुट भइ लाग्न जरुरी छ । रासस
