धनगढी- सुदूरपश्चिम प्रदेशका उद्योग, पर्यटन, वन तथा वातावरण मन्त्री रमेशसिंह धामीले आफ्नो मन्त्रालय र मातहत निकायका कर्मचारीसँग पछिल्लो छ महिनाको कार्यप्रगति विवरण माग गरेका छन् । उद्योग, पर्यटन, वन तथा वातावरण मन्त्रालयको दोस्रो त्रैमासिक समीक्षा गोष्ठीमा उनले आफू मन्त्री हुँदा भएका निर्णय र निर्देशनहरु कार्यान्वयको अवस्था प्रस्तुत गर्न भनेका छन् ।
मन्त्री धामीले छ महिनासम्म कतिपय निर्णय र निर्देशनहरु कार्यान्वयन नभएको भन्दै कर्मचारीको कार्यशैलीप्रति असन्तुष्टिसमेत व्यक्त गरे । वन कार्यालयहरुमा वर्षौँदेखि लिलाम हुन नसकेर सड्न लागेका काठ तथा जीर्ण बनेका सवारी साधनको व्यवस्थापन गर्ने, कर्मचारीको विवरण अद्यावधि गर्ने, मन्त्रालयका सबै कामहरु वेवसाइटमार्फत सार्वजनिक गर्ने, संभावित भूक्षय नियन्त्रणको पूर्वतयारी गर्ने निर्णयहरु भए पनि त्यसअनुसार काम हुन नसकेकोमा उनको असन्तुष्टि थियो ।
‘वनका कार्यालयहरुमा जीर्ण अवस्थाका बस्तु तीन महिनाभित्र व्यवस्थापन गर्ने निर्णय गरेका थियौँ, त्यो के कारणले रोकिएको छ ?’ उनले भने, ‘हाम्रा वन कार्यालयहरुमा विभिन्न प्रकृतिका काठहरु छन्, तीन महिनाभित्र काम गर्ने भनेका थियौँ तर अहिलेसम्म मन्त्रालयमा त्यसको रिपोर्ट आएको छैन ।’
मन्त्रालय तथा मन्त्रालय मातहतका निकायको कर्मचारी संगठन तथा व्यवस्थापन सर्भेक्षण गर्ने, बाढीपीडित, सुकुम्बासीका नाममा अतिक्रमणमा परेको वन क्षेत्रको व्यवस्थापन गर्नेलगायत निर्णयमा भएको कार्यप्रगतिको विवरण समीक्षा गोष्ठीमा प्रस्तुत गर्न मन्त्री धामीले निर्देशन दिए । कार्ययोजना बनाएर काम गर्नुपर्नेमा उनले जोड दिए ।
मन्त्री फेरबदलको हल्लामा नलागेर आफ्नो जिम्मेवारी इमान्दारितापूर्वक निर्वाह गर्न पनि उनले कर्मचारीलाई आग्रह गरे । ‘मन्त्री गइहाल्छ भन्ने हल्ला छ, यसमा चाँसो लिएर केन्द्रीत हुन जरुरी छैन’ उनले भने, ‘मन्त्री गए पनि मन्त्रालय रहन्छ । को आए÷गए भन्दा पनि आफ्नो जिम्मेवारी इमान्दारितापूर्वक निर्वाह गर्नुपर्छ ।
जनतालाई केन्द्रीत गरेर सही काम गर्ने हो । मैले त्यही साँेचेर काम गरिरहेको छु । मन्त्रीबाट हटे पनि रमेश धामीले खराब काम गरेछ, यसले खराब काम गरेको छ भन्ने पारेको छैन ।’ दुई दिन चल्ने समीक्षा गोष्ठीमा उद्योग, पर्यटन, वन तथा वातावरण मन्त्रालय र मातहत निकायका प्रमुखहरुको सहभागिता रहेको छ ।
