धनगढी– सुदूरपश्चिम प्रदेशको उद्योग, पर्यटन, वन तथा वातावरण मन्त्रालयको चालु आवको दोस्रो चौमासिक अवधिसम्मको समीक्षा गोष्ठी सम्पन्न भएको छ । धनगढीमा दुई दिन सञ्चालन भएको समीक्षा गोष्ठी विभिन्न निर्णय गर्दै सोमबार सम्पन्न भएको हो ।
गोष्ठीले मातहतका सबै कार्यालयको लक्षित गरे बमोजिम भौतिक र वित्तीय प्रगतिका लागि कार्यसम्पादनलाई चुस्त बनाउँदै अगाडि बढ्ने,निजी वनको कटान, सङ्कलन, ओसारपसार तथा बिक्री वितरण सम्बन्धी कार्यविधि मस्यौदा तयारीका लागि समिति गठन गरेको तथा उक्त समितिलाई २१ दिनभित्र अन्तिम मस्यौदा तयार गर्नु पर्ने निर्णय गरेको मन्त्रालयले जनाएको छ ।
विभिन्न जिल्लामा वन्यजन्तुबाट भएको क्षति बापतको राहतका लागि आवश्यक बजेटका लागि प्रदेश सरकार समक्ष अनुरोध गर्ने,सबै घरेलु कार्यालयहरू,डिभिजन वन कार्यालय र भू–तथा जलाधार व्यवस्थापन कार्यालयहरूको दोस्रो त्रैमासिक अवधिसम्मको प्रगति विवरण एकीकृत गरी तीन दिन भित्र मन्त्रालयमा पेश गर्ने र सुदूरपश्चिम प्रदेश वन ऐन, २०७७ को मस्यौदा उपर तीन दिनभित्र डिभिजन वन कार्यालयहरूले मन्त्रालयलाई सुझाव पेश गर्नुपर्ने समीक्षा गोष्ठीको निष्कर्षमा उल्लेख छ ।
चालु आवमा कार्यालय प्रमुखले प्रचलित ऐन, नियममा भएको जिम्मेवारी गहनरुपमा बहन गर्दै वार्षिक लक्ष्य अनुसारको प्रगति पूरा गरी सम्पन्न गर्ने,बेरुजु कम्तीमा चालिस प्रतिशत फर्छ्यौट गर्ने, मातहतका कर्मचारीलाई प्रभावकारी टोलीको निर्माण गर्दै परिचालन गर्ने, अधिकतम सेवा प्रवाह गर्ने निर्णय भएको जनाइएको छ ।
दिगो वन व्यवस्थापन कार्यविधि (निर्देशिका) को प्रारम्भिक मस्यौदामाथि सहभागीबाट प्राप्त पृष्ठपोषण दस दिनभित्र समावेश गरी कार्यदलले अन्य सरोकारवालाहरूसँग छलफल, अन्तरक्रिया गरी व्यापक स्वीकृतिका लागि क्लस्टरका आधारमा परामर्श बैठक आयोजना गर्ने र प्राप्त सुझाव समेतका थप प्रक्रिया अगाडि बढाउने निर्णय भएको मन्त्रालयले जनाएको छ ।
