डडेल्धुरा उद्योग वाणिज्य संघको चुनाव यही भदौ २५ हुँदैछ । चुनावको मिति नजिकिएपछि जिल्लामा चुनावी सरगर्मी पनि बढेको छ । संघको अध्यक्षका लागि अघिल्लो चुनावमा पराजित भएका भोजराज भट्ट र संघका बर्तमान प्रथम उपाध्यक्ष द्विजराज भट्टले आकांक्षा देखाएका छन् । दुबै जनाले तयारी पनि सुरु गरिसकेका छन् । यसमध्ये अघिल्लो चुनावमा झिनो मतान्तरले पराजित भएका भोजराज भट्टसंग चुनावी तयारीलगायतका विषयमा बिन्तीपत्र टिमले कुराकानी गरेको छ । प्रस्तुत छ उनीसंग गरिएको कुराकानीको सम्पादित अंशः

डडेल्धुरा उद्योग वाणिज्य संघको अध्यक्षका लागि आकांक्षी हुनुहुन्छ, कस्तो छ तयारी ?
डडेल्धुरा उद्योग वाणिज्य संघको अध्यक्षका लागि तयारी गरिराखेको छु । म यो भन्दा अगाडिको चुनावमा पनि थोरै मतले पराजित भएको थिएँ । मंसंग २०५९ सालदेखि कार्यसमिति सदस्य, महासचिव र प्रथम उपाध्यक्ष हुँदै डडेल्धुरा उद्योग वाणिज्य संघमा काम गरेको अनुभव छ । अहिले पुनः व्यवसायी साथीहरुको सल्लाह सुझाव अनुसार अध्यक्षमा उम्मेदवारी दिने तयारी गरेको छु । व्यवसायी साथीहरुले पनि सहयोग गर्ने प्रतिबद्धता जनाउनुभएको छ ।

अघिल्लो पटक पराजित हुनुभयो यो पटक जितिन्छ भन्ने आधार केही छ ?
त्यो बेला मैले झिनो मतले मात्रै हार व्यहोर्नु परेको थियो । म डडेल्धुरामा लामो समयदेखि उद्योगी व्यापारीहरुको हकहित संरक्षणका लागि लागिपरेको छु । विभिन्न समस्याहरुको बाबजुद पनि म उहाँहरुसँग नजिकै पुगेको छु । डडेल्धुरा उद्योग वाणिज्य संघ पहाडी सातवटा जिल्लाको केन्द्र बिन्दुमा छ । जसले निजी क्षेत्रको नेतृत्व गर्छ । म यस क्षेत्रमा उद्योगी व्यवसायीहरुको हकहित संरक्षणलगायत आर्थिक गतिविधि बढाउनका लागि लागिरहेको छु । पर्यटन विकास र उद्योगहरुको स्थापना र फराकिलो सडक, ढल निकास, खानेपानी, फोहरमैला व्यवस्थापन, स्थानीय कला संस्कृति, उत्पादन, खेलकुद, शिक्षा, स्वास्थ्यलगायतका कुराहरुमा निजी क्षेत्रहरुले पनि ध्यान दिनुपर्छ । म यही भूमिका निर्वाह गर्ने उद्देश्यसहित संघको अध्यक्ष हुन खोजिरहेको छु । यसका लागि स्थानीय सरकार, प्रदेश र संघीय सरकारसँग समन्वयात्मक भूमिका निर्वाह गर्छु । यहाँका उद्योगी व्यवसायहरुलाई आर्थिक गतिविधिबाट अगाडि बढाउनुपर्छ । यसरी मात्रै यहाँको आर्थिक गतिविधि बढ्छ । यस क्षेत्रको अधिकतम विकासका लागि उद्योग वाणिज्य संघ निजी क्षेत्र मार्फत अगाडि बढ्नुपर्छ । यही कुरामा विश्वास गरेर यहाँका प्रतिष्ठित व्यापारीहरुले मलाई यसपटक मलाई जित दिलाउनुहुन्छ भन्ने विश्वास लिएको छु ।

डडेल्धुरा उद्योग वाणिज्य संघ र यहाँका उद्योग व्यवसायहरुको हकहितका लागि के–के गर्नुहुन्छ ?
अहिले निजी क्षेत्र कोभिड–१९ देखि यता आर्थिक मन्दीका कारण धरासायी छ । नेपालमा मात्रै होइन विश्व परिवेशमा यही अवस्था छ । डडेल्धुराका उद्योगी व्यवसायीको हालत पनि यही हो । जसले गर्दा अहिले हामीले गर्दै आएको व्यवसाय मोडालिटी परिवर्तन हँुदै गएको छ । आधुनिक तवरले हामीले व्यापार व्यावसाय गर्नुपर्ने बाध्यता छ । व्यवसायहरु विभिन्न तरिकाले मारमा परेका छन् । चर्का ब्याजदरलगायत विभिन्न कारणले गर्दा आफ्नो व्यवसाय धरासय भएको छ । अब यस क्षेत्रमा आर्थिक गतिविधिहरु बढाउनका लागि यहाँको स्थानीय उत्पादनलगायतका उद्योगहरु स्थापना गर्न आवश्यक छ । यहाँको सरकारले निजी क्षेत्रलाई हेर्ने दृष्टिकोणमा फरक ल्याउनुपर्छ । अब औद्योगिक क्षेत्रहरु घोषणा गरेर उद्योगी व्यवसायहरुलाई लगानीको वातावरण बनाउनुपर्छ । यसका लागि उद्योग वाणिज्य संघले समन्वयात्मक भूमिका खेल्नुपर्छ । यदि म निर्वाचित भएँ भने यो काम कुशलताका साथ गर्छ । जसले यहाँको आर्थिक गतिविधि बढोस् र चलायमान होस् । यसको अर्थ उद्योग व्यवसाय फस्टानु नै हो ।

डडेलधुराको उद्योग व्यवसायमा के–के समस्याहरु छन् ?
डडेल्धुरा पहाडी जिल्ला हो । तर पनि यहाँका सात पहाडी जिल्लाको केन्द्रमा छ । यहाँका व्यवसाय गतिविधिहरु तराईका दुई जिल्ला कैलाली र कञ्चनपुर भन्दा भिन्न प्रकारले अघि बढिरहेका छन् । यहाँ सबै ठाउँमा फराकिलो सडक नभएका कारण उत्पादन बजारसम्म पुर्याउन सक्ने अवस्था छैन वा समयमै पुग्न सकेको छैन । यो समस्या समाधानका लागि सरकारको खासै ध्यान पुग्न सकेको छैन । यसमा समन्वयात्मक भूमिका उद्योग वाणिज्य संघले खेल्न सक्नुपर्छ । व्यवसायीहरुलाई उत्पादित बस्तुहरु विक्री गर्न विभिन्न कठिनाइहरु आइपरेका छन् । दिनानुदिन व्यवसाय धरासय हुँदै आइरहेको अवस्था छ । यो यहाँको मात्रै समस्या होइन देशभरी नै यस्तो अवस्था छ । अहिले आर्थिक मन्दीका कारणलगायतले गर्दा यस्तो अवस्था आएको हो । अब हामीले यस क्षेत्रमा आर्थिक गतिविधि बढाउन विभिन्न मेला महोत्सव लगाउने, जसले यहाँको कला संस्कृतिहरु पनि जगेर्ना हुन्छ । यहाँ भौतिक पूर्वाधारहरु निर्माण गर्न सिटीहलहरु, कबडहलहरु निर्माण गर्ने कार्य गर्नुपर्छ । जसले यस क्षेत्रको पर्यटन विकासमा पनि टेवा पुग्छ । यस क्षेत्रका होटल व्यवसायदेखि लिएर विभिन्न क्षेत्रहरुको व्यापार व्यवसाय अगाडि बढन सक्छ् । हामीले ति आर्थिक गतिविधि बढाउनका लागि पनि उद्योग वाणिज्य संघले समन्वयात्मक भूमिका खेल्नुपर्छ ।