धनगढी । कैलालीको कैलारी गाउँपालिका–६ बन्कट्टाका किसान अभियन्ता रामदत्त चौधरीले बजेट माथि असन्तुष्टि जनाउँदै जिल्ला प्रशासन कार्यालय कैलालीको गेटमा धर्ना दिएका छन् ।
सरकारले आगामी आर्थिक वर्ष २०८१÷०८२ का लागी ल्याएको बजेट प्रति असन्तुष्टि जनाउँदै चौधरीले बुधवार प्रशासन गेटमा आधा घण्टा धर्ना दिएका हुन् ।
सरकारले कृषि क्षेत्रमा कम बजेट विनियोजन गरेको र किसानलाई उपेक्षा गरेको भन्दै गेटमा उभिएर ‘किसान बचाउ, देश बनाऊँ, किसान एकता जिन्दाबाद, देशभरिका किसान एकजुट हौँ’ भन्ने पिलेकार्ड लिएर धर्ना दिएका थिए ।
उनले सरकारले कृषि क्षेत्रमा बजेट बढाउनु भन्दा घटाएर बजेट विनियोजन गर्दा आफूलाई दुःख लागेको बताए । नेपाल कृषि प्रधान देश भए पनि सरकारले कृषि क्षेत्रमा बजेट घटाएर विनियोजन गरेकाले किसानहरूको कृषि क्षेत्रमा लाग्ने आकर्षण र मनोबल घट्ने बताए ।
किसानले लगानी र मेहनत अनुसार उत्पादन गरेको खाद्यान्न कम मूल्यमा बेच्नुपर्दा घाटा बेहोरी राखेको अवस्थामा सरकारले कृषिलाई बजेटमा उपेक्षा गर्दा कृषि क्षेत्रबाट किसान पलायन हुने चिन्ता व्यक्त गरे ।
कृषि क्षेत्रको विकास नभएसम्म देशको विकास नहुने भएकाले यसमा सरकारले गम्भीर बन्नुपर्नेमा उनले जोड दिए । यसका साथै वैज्ञानिक विधिबाट मूल्य निर्धारण गर्नुपर्ने, भन्सारबाट आयात भन्दा निर्यात बढाउनुपर्ने,रासायनिक मल, बिउ बिजनमा अनुदान र प्राथमिकता दिनुपर्ने माग गरे ।
उनले सरकारले समयमै यस विषयमा गम्भीर नबनेमा घर घरबाट किसानहरू सडकमा उत्रिने चेतावनी दिए । सरकारले आगामी आर्थिक वर्ष २०८१÷०८२ का लागि कृषि तर्फ एक अर्ब ६९ करोड रुपैयाँ बजेट विनियोजन गरेको छ ।
