धनगढी । सुदूरपश्चिम प्रदेशका मुख्यमन्त्री दीर्घबहादुर सोडारीले प्रदेशवासीलाई अपनत्व बोध हुने गरी आगामी आर्थिक वर्षको बजेट ल्याउने बताएका छन् ।
बुधबार धनगढीमा आयोजित प्रदेश समन्वय परिषदको पाँचौ बैठकलाई सम्बोधन गर्दै उनले प्राथमकिताका आधारमा जनजीविकाका सवालमा केन्द्रित भएर बजेट विनियोजन गर्न प्रदेश सरकार लागि परेको बताए ।
उनले बजारमा कमिसनका आधारमा बजेट विनियोजन गर्ने अफवाह फैलाइएको बताउँदै हल्लाका भरमा नलाग्न प्रष्ट पारे । उनले बजारमा फैलाइएको हल्लामा कुनै तुक नभएकोले आफूले प्रदेशको समग्र विकासलाई ध्यानमा राखेर अघि बढ्ने प्रण गरे ।
सुदूरपश्चिमका ८८ पालिका मध्ये तीन पालिका अझैं सडक सञ्जालसँग नजोडिएकोले आगामी आर्थिक वर्षमा ती पालिकाका केन्द्रलाई सडक सञ्जालसँग जोड्न प्रदेश सरकारले विशेष ध्यान दिएको उनले बताए ।
उनले अपि हिमाल, सैपाल र सिगास गाउँपालिकालाई सडक सञ्जालसँग जोड्न प्रदेश सरकारले आवश्यक बजेट विनियोजन गर्न जरुरी रहेको बताए ।
मुख्यमन्त्री सोडारीले प्रदेश र स्थानीय सरकार मिलेर नै प्रदेशको समृद्धि हुने बताउँदै त्यसका लागि प्रदेश सरकार र स्थानीय सरकारबीच समन्वयकारी भूमिका निर्वाह गर्न सबै लाग्नु पर्ने बताए ।
उनले सुदूरपश्चिम प्रदेकको आर्थिक समृद्धिका लागि प्रदेश र स्थानीय सरकार मिलेर अघि बढ्नुको विकल्प नभएको बताए ।
विकास निर्माणका सवालमा सबैलाई न्याय हुने गरी बजेट विनियोजन गरिने उनले बताए । उनले आवश्यकताका आधारमा बजेट ल्याउने प्रतिवद्धता व्यक्त गरे ।
प्रदेश नीति तथा योजना आयोगका उपाध्यक्ष गणेश विकेले प्रदेशको योजनावद्ध विकासका लागि आफूहरुले खाका कोरेर अघि बढेको बताए । मानवीय विकास नभएसम्म प्रदेशको विकास सम्भव नभएकोले शिक्षा, स्वास्थ्य, खानेपानी तथा रोजगारीलाई प्राथमिकतामा राखेर प्रदेश सरकार अघि बड्ने उनको भनाइ थियो ।
समन्वय बैंठकमा विभिन्न पालिकाका प्रमुख तथा उपप्रमुखले प्रदेश र स्थानीय तहबीच समन्वय गरेर अघि बढे मात्र सुदूरपश्चिमको विकासले गति दिने बताएका थिए ।
