धनगढी- कैलालीको धनगढी उपमहानगरपालिकाका स्वास्थ्यकर्मीलाई आत्महत्या रोकथाम सहजिकरण सम्बन्धी तालिम दिइएको छ ।
वर्ल्डलिङ्क कम्युनिकेशन्स लिमिटेड र साइकडेस्क फाउण्डेशन काठमाण्डौँको आयोजनामा स्वास्थ्यकर्मीलाई धनगढीमा दुई दिने तालिम दिइएको हो ।

शनिबार सम्पन्न तालिममा उपमहानगरका १९ वटै वडामा कार्यरत ३० जना स्वास्थ्यकर्मीको सहभागिता रहेको आयोजकले जनाएको छ
साइकडेस्क फाउण्डेशनका संस्थापक एवं तालिमका मुख्य प्रशिक्षक मनोविद डा. नरेन्द्रसिंह ठगुन्नाले समाजमा बढीरहेको आत्महत्या रोकथामका लागि सहज होस् भन्ने उदेश्यले तालिम सञ्चालन गरिएको बताए ।

उनले भने ‘विश्वमा वार्षिक सात लाख तीन हजार जनाले आत्महत्याबाट ज्यान गुमाइ रहेका तथ्याङ्कले देखाउँछ । नेपालमा झण्डै सात हजारको हाराहारीमा आत्महत्याबाट ज्यान गुमाइरहेका छन् । यसलाई रोक्न परामर्शका लागि सहयोग पुगोस भनेर तालिमको आयोजना गरेका हौँ ।’
‘प्रायः आत्महत्या मानसिक रोगका कारण हुने गरेको छ । यो तालिम सबैलाई आश्यक छ’ उनले भने ‘स्वास्थ्यकर्मी अग्रपंतिमा रहेर काम गर्ने भएकाले मनोपरामर्शका लागि सक्षम बनाउन उहाँहरुलाई तालिम दिइएको हो ।’ उपचार तथा परामर्शले आत्महत्या रोक्न सकिने उनको भनाइ थियो ।

वर्ल्डलिङ्क कम्युनिकेशन लिमिटेडकी कर्पोरेट सामाजिक उत्तरदायित्व कार्यक्रम प्रमुख अनुपा भण्डारी जलानले सरकारले आत्महत्या रोकथामका लागि प्रयास गरिरहेका बेला निजी क्षेत्रबाट पनि केही सहयोग पुगोस् भनेर तालिमको आयोजना गरिएको बताइन ।
उपमहानगरका स्वास्थ्य शाखा प्रमुख योगेश अवस्थीले तालिमले मानसिक रोगका लक्षण थाहा पाउन तथा परामर्शका लागि सहज भएको बताए । उनले भने ‘पछिल्लो समय नसर्ने रोगको चाप बढ्दै गएको छ । त्यसमा अधिकांश मानसिक रोगी छन् । त्यसलाई छुट्याउनका लागि सहज हुने भएको छ ।’

तालिममा सहभागी जनस्वास्थ्य निरीक्षक अनिता खड्काले तालिम पश्चात मानसिक रोगीको पहिचान र परामर्शमा सहजता हुने बताइन् । ‘हरेक मान्छे कुनै बेला मानसिक स्वास्थ्यको सिकार हुन्छ, जसले गर्दा आत्महत्या बढेको छ । त्यसका लागि उपचार तथा परामर्श आवश्यक हुन्छ”,उनले भनिन् ‘उपचार र परामर्शले आत्महत्या रोक्न सकिन्छ भन्ने जानकारी भयो । अब हामीलाई पनि मानसिक रोगका लक्षण चिनेर परामर्श गर्न सहज हुने भएको छ ।’

अर्का सहभागी सिअहेव जयकला रावलले तालिमले आत्महत्या न्युनिकरण कसरी गर्न सकिन्छ भन्ने कुराको ज्ञान भएको बताइन । ‘मानसिक रोगका लक्षण,आत्महत्या रोकथाममा परिवार,समाज र स्वास्थ्यकर्मीले खेल्न सक्ने भूमिका बारेमा पनि जानकारी भयो’,उनले भनिन् ‘अव हामीलाई पनि परामर्श गर्न सहज हुने भएको छ ।’