धनगढी- सुदूरपश्चिम प्रदेशमा गत आर्थिक वर्ष २०८०/८१ मा ७३ हजार चार सय ७९ सवारी साधन कारबाहीमा परेका छन् । ट्राफिक प्रहरीले प्रदेशभरी नियम उल्लङ्घन गर्ने उक्त संख्याका सवारी साधन कारबाही गरेको हो ।
उक्त सवारी साधन कार्बाहीबाट चार करोड ८९ लाख ८७ हजार राजस्व सङ्कलन भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाका प्रवक्ता प्रहरी नायव उपरीक्षक अनिलकुमार उप्रेतीले जानकारी दिए ।
गत वर्ष तीन सय नौ वटा सवारी दुर्घटना भएको उनले बताए । ती सवारी दुर्घटनाबाट एक सय ७२ जनाको मृत्यु भएको र पाँच सय ३६ जना घाइते भएको उनले जानकारी दिए ।
मोटरसाइलक,जीप/कार,ट्याक्टर,बस,टेम्फो,ट्रक/ट्याङ्कर,टिप्पर,माइक्रो, डोजरलगायतका चार सय छ सवारी साधन दुर्घटनामा सङ्लग्न भएको उनले बताए । जसमा सबैभन्दा बढी दुई सय सात मोटरसाइकल दुर्घटनामा संलग्न भएको जनाइएको छ ।
त्यस्तै गत आवमा छ हजार छ सय २६ वटा जनचेतनामूलक कार्यक्रम गरेको गरेको र तीन लाख ८९ हजार दुई सय ६६ जना लाभान्वित भएको प्रवक्ता उप्रेतीको भनाइ छ ।
आर्थिक वर्ष २०७९/८० मा नियम उल्लङ्घन गर्ने एक लाख १२ हजार छ सय ५५ सवारी साधन कारबाहीमा परेको र छ करोड ४३ लाख ७२ हजार राजस्व सङ्कलन भएको जनाइएको छ ।
त्यस्तै दुई सय ५५ सवारी दुर्घटना हुँदा एक सय ७७ जनाको मृत्यु भएको थियो भने चार सय ७३ जना घाइते भएका थिए ।
मादक पदार्थ सेवन गरी सवारी चलाउँदा,ओभर स्पिड,चालकको लापरबाहीलगायतका कारण बढी दुर्घटना हुने गरेको प्रवक्ता उप्रेती भनाइ छ ।
