धनगढी- कैलालीमा स्कुल बस दुर्घटना हुँदा तीन विद्यार्थी घाइते भएका छन् । आज (सोमबार) जिल्लाको गोदावरी नगरपालिका–९ बल्मी नजिकै स्कुल बस दुर्घटना भएको हो।
गोदावरी नगरपालिका–८ मास्थित दुर्गाज्योती इङ्लिस बोर्डिङ्ग स्कुलको से ०१००१ ख २१८२ नम्बरको बस दुर्घटना हुँदा बसमा सवार १५ वर्षीय विप्लब खड्का, १४ वर्षीय प्रकाश रावत र १६ वर्षीय रोशन नेपाली घाइते भएको इलाका प्रहरी कार्यालय मालाखेतीका प्रमुख गंगाबहादुर थापाले जानकारी दिए।
घाइते तीनै जनाको अत्तरियास्थित पद्मा अस्पतालमा उपचार भइरहेको जनाइएको छ । बसमा २७ जना विद्यार्थी सवार रहेको जनाइएको छ। बस चालक ३५ वर्षीय सैतुराम चौधरीलाई प्रहरीले नियन्त्रणमा लिएको छ। दुर्घटनाको कारण भने खुलेको छैन्।
