धनगढी । धनगढी उपमहानगरपालिकामा खानेपानीको गुणस्तर परीक्षण सुरु भएको छ । बर्खायाम सुरु भएसँगै पानीजन्य रोग निम्तिने खतरा बढ्ने भएकाले त्यसको पूर्व तयारी स्वरुप उपमहानगरपालिकाले खानेपानीको गुणस्तर परीक्षण सुरु गरेको हो ।
उपमहानगर भित्र रहेका खानेपानी निगम, संस्थान, डिपो तथा बोरिङको खानेपानी गुणस्तर परीक्षण सुरु भएको हो । धनगढी उपमहानगरपालिका– ५ मा रहेको शिवनगर खानेपानी तथा सरसफाई उपभोक्ता संस्थाबाट पानी परीक्षण सुरु गरिएको हो । बिगतका बर्षमा समेत धनगढीमा केही पानीजन्य रोग देखा परेकाले त्यसको पूर्व शुरक्षा अनुरुप खानेपानी संस्थाहरुको पानीको गुणस्तर परीक्षण गरिन लागेको उपमहानगरपालिकाका स्वास्थ्य शाखा प्रमुख योगेश अवस्थीले जानकारी दिए । नगरबासीलाई खानेपानीबाटै सर्ने रोगबाट बचाउनका लागि पूर्व तयारी स्वरुप हरेक खानेपानी वितरण केन्द्रका ट्याङ्कीबाट नमुना झिकेर परीक्षण सुरु गरिएको उनले बताए ।
खानेपानी ट्याङ्की र सो संस्थाबाट वितरण भएको अन्तिम बिन्दुबाट पनि पानीको नमुना लिएर खानेपानीको गुणस्तर परिक्षण भइरहेको उनले बताए । उनले भने “हामीले पानीको स्वच्छता कत्तिको छ र पानीबाट फैलिने रोग विशेषगरी छाडापखालाका किटाणहरु छन् की छैनन्, पानी सामान्यतया धमिलोपन कत्तिको छ त्यो हेर्दैछौँ, पानीको अमलियपना तथा छारियपना के छ त्यो पनि चेक गर्दैछौँ, हामी उपमहानगरपालिका भित्र जतीपनि खानेपानी वितरण केन्द्रका ट्याङ्कीहरु छन् त्यसको पानी र त्यसले वितरण गरेको अन्तिम बिन्दुमा गएरपनि नमुना परीक्षण गरिरहेका छौँ ।”
उपमहानगरपालिका भित्र वितरण भइरहेका सबै वितरण केन्द्रका ट्याङ्की र केही समुदायमा समेत गएर नमुना संकलन गरी परीक्षण गरिने अवस्थीले बताए ।
