धनगढी । नेपाली काँग्रेस सुदूरपश्चिम प्रदेशका संसदीय दलका प्रमुख सचेतक विक्रमसिं धामीले सुदूरपश्चिम प्रदेशमा पर्यटनको प्रचुर सम्भावना रहेको बताएका छन् ।
संस्कृति, पर्यटन तथा नागरिक उड्यन मन्त्रालय,तारा गाउँ विकास समितिले भादा थारु सामुदायिक होमस्टेमा सोमबार आयोजना गरेको सुदूरपश्चिम प्रदेशगत होमस्टे(घरवास) कार्यशाला गोष्ठीको समापन कार्यक्रममा बोल्दै उनले सुदूरपश्चिमको पर्यटन विकासका लागि विशेष योजना ल्याउन आवश्यक रहेको बताए ।
उनले सुदूरपश्चिम प्राकृतिक, सांस्कृतिक एवम् धार्मिक पर्यटकीय सम्भावना बोकेको क्षेत्र भएकाले यहाँको पर्यटकीय क्षेत्रलाई एकीकृत रुपमा अनुसन्धान गर्न तारा गाउँ विकास समितिलाई आग्रह गरे ।
सुदूरपश्चिममा ऐतिहासिक धार्मिक पर्यटकीय क्षेत्रको धेरै सम्भावना भएपनि नेपालीहरु भारतमा रहेका तीर्थस्थलमा जाने प्रचलन बढेको बताउँदै उनले यहाँका धार्मिक पर्यटकीय क्षेत्रको प्रचार प्रसार गर्न आवश्यक रहेको बताए ।
उनले तारा गाउँ विकास समितिले होमस्टेको परिकल्पना गरेकोले देशभर होमस्टेको अवधारण फैलिँदै गएको बताए । सुदूरपश्चिमका होमस्टेमा आएका पर्यटकप्रति दुव्र्यवहार गरेको गुनासो नसुनेको बताउँदै उनले त्यसो गरेमा देशभरका होमस्टेको बदनाम हुने बताए ।
होमस्टे चल्नका लागि हाम्रो संस्कृति हाम्रो भेषभूषाले मात्र चल्न नसक्ने भएकोले त्यसलाई मर्यादित बनाउन आवश्यक रहेको बताए ।
यसैगरी तारा गाउँ विकास समितिका अध्यक्ष सुरेश जोशीको अध्यक्षतामा दुई दिनसम्म सञ्चालन भएको प्रदेशगत होमस्टे कार्यशाला गोष्ठिले ६ बुँदे घोषणा पत्र जारी गरेको छ । होमस्टे पर्यटनलाई व्यवस्थित र नेपालको पर्यटन उद्योगमा थप सेवा दिन सक्ने बनाउन होमस्टे इकाइहरुको आन्तरिक सुशासनको समृद्धीकरण गर्दै दिगो होमस्टे पर्यटन अभियान सन्चालन गर्ने, होमस्टेमा मन, यसैमा छ जीवन भन्ने मुल मर्मका साथ स्थानीय कला, संस्कृति, खानपिन, रैथाने उत्पादनहरुको संरक्षण,प्रवर्धन र उपयोगितामा जोड दिने , सुदुरपश्चिम क्षेत्रमा रहेका महत्वपूर्ण ऐतिहासिक, सांस्कृतिक, धार्मिक, प्राकृतिक धरोहरसम्मको सरक्षण र प्रवर्धनमा अग्रसर हुदै होमस्टे पर्यटनको माध्यमले ग्रामीण गरिबीलाई न्युनीकरण गर्न तीनै तहका सरकारसँग जोडदार माग पनि गरेको छ ।
त्यस्तै होमस्टे सन्चालनमा समुदाय विशेष मौलिकता संरक्षण गर्दै व्यावसायिकतामा सुदृढीकरण, उत्पादनको विविधीकरण गर्दै बजारीकण गर्नमा लाग्न सम्पूर्ण होमस्टेकर्मीमा अनुरोध गर्ने, होस्टेहरुबीच आन्तरिक सम्बन्ध, सम्पर्क र सहकार्यका लागि होमस्टे मितेरी सम्बन्ध विस्तार गर्ने र सुदुरपश्चिम प्रदेश स्तरीय होमस्टे कार्यशाला गोष्ठीको व्यवस्थापन गरेकोमा होमस्टे महासंघ सुदुरपश्चिम प्रदेश कमिटि र आयोजकका लागि भादा सामुदायिक होमस्टेलाई धन्यवाद दिइएको छ ।
