धनगढी । सुदूरपश्चिम प्रदेशका मुख्यमन्त्री कमलबहादुर शाहले सुरक्षा निकायका प्रमुखहरुसँग प्रदेशको समग्र शान्ति सुरक्षाको अवस्थालगायत विविध बिषयमा छलफल गरेका छन् ।

शुक्रबार मुख्यमन्त्री तथा मन्त्रिपरिषद्को कार्यालयमा प्रदेशको शान्ति सुरक्षा सम्बन्धी समसमायिक विषय छलफल गरेका हुन् । छलफलमा लागुऔषध नियन्त्रण, सीमामा हुने आपारिधिक क्रियाकलाप नियन्त्रण र सीमा क्षेत्रमा सहज आवागमनका विषयमा छलफल भएको थियो । साथै सीमा क्षेत्रमा बढाइएको सुरक्षा निगरानीका विषयमा छलफल भएको छ । सीमामा हुने लागुऔषध नियन्त्रण,आपराधिक क्रियाकलाप नियन्त्रण गर्न र चोरीका घटनाहरु बढी रहेको अवस्थामा सीमा निगरानी कडाइ गरिएको सुरक्षा निकायले बताएका छन । लागुऔषध प्रयोगकर्ताभन्दा व्यापारीहरुलाई समात्न सुरक्षाको प्रभावकारितालाई बढाइएको सुरक्षा निकायले बताएका थिए ।

छलफलमा विभागीय मन्त्रीहरु, विभागीय सचिव, प्रमुख जिल्ला अधिकारीका साथै सुदूरपश्चिम प्रदेश प्रहरी कार्यालयका प्रहरी नायव महानिरिक्षक डम्बरबहादुर विक,सशस्त्र प्रहरी बल ७ नं वैद्यनाथ बाहिनीका सशस्त्र प्रहरी नायव महानिरीक्षक प्रदिपकुमार पाल लगायत राष्ट्रिय अनुसन्धान प्रदेश कार्यालयका निर्देशक,जिल्ला प्रहरी कार्यालय कैलाली,जिल्ला प्रहरी कार्यालय कञ्चनपुर,सशस्त्र प्रहरी बल नेपाल ३४ नं गण कैलाली, सशस्त्र प्रहरी बल नेपाल ३५ नं गण,कन्चनपुरका प्रमुखको उपस्थिति रहेको रहेको थियो ।