धनगढी । नेपाल कम्युनिष्ट पार्टी (एकीकृत समाजवादी) ले धननगढी उपमहानगरपालिकालाई ज्ञापनपत्र बुझाएको छ ।
शुक्रबार नेपाल कम्युनिष्ट पार्टी (एकीकृत समाजवादी) धनगढी उपमहनगर कमिटीले १७ बुँदे माग राख्दै ज्ञापनपत्र बुझाएको हो ।
धनगढी उपमहानगर भित्रका सडकका बीचमा रहेका रुखहरु कटान गरी सडक फराकिलो बनाउनु पर्ने,खोलानालाहरुको अतिक्रमण हटाई धनगढी डुवानको समस्या समाधान गर्नुपर्ने,सुकुम्वासी, भूमिहीन दलित र अव्यवस्थित बसोवासीहरूको जग्गाको नापजाँच गरि तुरुन्तै लालपुर्जा वितरण गर्नुपर्ने माग उल्लेख गरिएको छ ।
यसैगरी, भारतसँगको खुल्ला सीमाका कारण हुने अबैध लागुपदार्थ कारोबार नियन्त्रण गर्नुपर्ने, फाप्ला क्रिकेट मैदानलाई स्तरोन्नती गर्न पहल गरिनु पर्ने, महानगरका सबै वडाका ग्रामीण सडकहरुमा विरुवा रोपेर हरियाली अभियान सञ्चालन गर्नुपर्ने पनि माग राखिएको समाजवादीका उपमहानगर कमिटी सचिव एकमबहादुर छेडालले बताए ।
ग्रामीण वडाका सडकहरु फराकिलो र कालोपत्रे गर्नुपर्ने, धनगढी क्षेत्रमा पानीको स्रोत सुक्दै गएको हुँदा सो समस्या समाधान गर्नुपर्ने,धनगढीको जाखोर ताल लगायतका प्राकृतिक तालको संरक्षण तथा पर्यटकीय क्षेत्रमा पूर्वाधार विकास गर्नुपर्ने, सरकारी तथा सामुदायिक विद्यालयहरुलाई प्रविधिमैत्री बनाई प्राविधिक शिक्षा केन्द्रीत हुनुपर्ने ज्ञापनपत्रमा उल्लेख छ ।
यसैगरी वडाका स्वास्थ्य चौकीहरुको स्तरोन्नति,विशेषज्ञ सेवा सञ्चालन गर्नुपर्ने, एक वडा एक खेलमैदान अनिवार्य बनाउनु पर्ने, आगलागी नियन्त्रणका लागि प्रत्येक वडामा दमकलको व्यवस्था गर्नुपर्ने, युवाहरुलाई रोजगारसँग जोड्न विभिन्न सीपमुलक तालिमहरु सञ्चालन गर्नुपर्ने ज्ञापनपत्रमा उल्लेख छ ।
त्यस्तै,वडा कार्यालयबाट प्रदान गरिने सेवाहरु झन्झटरहित बनाउनु पर्ने, शिवपुरी धाम, बेहडाबाबा मन्दिर जस्ता धार्मिक पर्यटकीय गन्तव्यमा भौतिक पूर्वाधारका संरचना निर्माण गरिनुपर्ने,धनगढीका प्रत्येक वडामा हरित पार्क निर्माण गरिनु पर्ने ज्ञापनपत्रमा माग गरिएको छ । ज्ञापनपत्र बुझाउने कार्यक्रममा नेपाल कम्युनिष्ट पार्टी (एकीकृत समाजवादी)का केन्द्रीय सदस्य लक्ष्मी चौधरी,सुशीला बुढाथोकी,जिल्ला अध्यक्ष विमल जोशी र जिल्ला सचिव दीर्घ जोशी कापडी सहभागी रहेका थिए ।
