धनगढी । डोटीको केदार सूर्य बहुमुखी क्याम्पस सञ्चालक समितिको बैठकमा नबोलाएको भन्दै स्वतन्त्र विद्यार्थी युनियनले आपत्ति जनाएको छ । स्ववियुले बुधबार एक विज्ञप्ति जारी गर्दै सञ्चालक समितिको बैठकमा नबोलाएको प्रति आपत्ति जनाएको हो ।

सभापति यशोदा बोहरा र सचिव विक्रम साउदको संयुक्त हस्ताक्षरित विज्ञप्तिमा भनिएको छ,‘मिति २०८२ ।०१ । २४ गतेका दिन केदार सुर्य बहुमुखी क्याम्पस सञ्चालक समितिको बैठक बसी विभिन्न निर्णय गरेको सुन्नमा आएको छ ।’

‘केदार सूर्य बहुमुखी क्याम्पस सञ्चालन सम्बन्धी विद्यानको परिच्छेद ४ को दफा १७ मा क्याम्पस सञ्चालक समितिको गठन सम्बन्धि व्यवस्था गरिएको छ । दफा १७ को उपदफा ‘क’ को बुँदा नं.६ मा स्ववियु सभापति क्याम्पस सञ्चालन समिति सदस्य रहने स्पष्ट व्याख्या गरिएको छ’, विज्ञप्तिमा भनिएको छ,‘क्याम्पस सञ्चालक समितिको बैठकमा स्ववियु सभापतिलाई कुनै जानकारी नदिई बैठक सञ्चालन गरेकोमा सञ्चालक समिति र क्याम्पस प्रशासन प्रति गम्भीर आपत्ति प्रकट गर्दछौं ।’

बैठकहरुमा स्ववियु सभापतिको उपस्थिति अनिवार्य हुनुपर्नेमा त्यसो नगर्नु असंवैधानिक, अत्यन्तै दुर्भाग्यपूर्ण,अलोकतान्त्रिक र विधि विपरीतको कार्य भएको विज्ञप्तिमा उल्लेख गरिएको छ ।

‘यस प्रकारको गैरजिम्मेवार र अपारदर्शी व्यवहारले विद्यार्थीको विश्वासमा आँच पुर्याउनुका साथै क्याम्पसको शैक्षिक र संस्थागत गरिमा समेत क्षतिग्रस्त भएको छ’ विज्ञप्तिमा भनिएको छ, ‘हामि यस घटनाको कडा भत्र्सना गर्दै आगामी दिनमा यस्तो कार्य नदोहोर्याउन चेतावनी दिन चाहन्छौं र क्याम्पस प्रशासनलाई तत्काल लिखित जवाफ सहित सार्वजनिक माफी माग्न समेत सचेत गराउन चाहन्छौं ।’

स्ववियुले विज्ञप्तिमार्फत विभिन्न माग समेत राखेको छ । स्ववियुले क्याम्पस प्रशासन र सञ्चालक समितिलाई ७ दिनभित्र आफ्ना मागहरुलाई पूरा गर्न समेत आग्रह गरेको छ । माग पूरा नभएमा कडा भन्दा कडा आन्दोलन गरिने विज्ञप्तिमा उल्लेख छ ।

यस्ता छन् स्ववियुले राखेका मागहरु

१. नियमित रुपमा विषय शिक्षकहरुबाट कक्षा सञ्चालनको व्यवस्था गरियोस्,
२. क्याम्पसमा भईरहेको राजनीतिकरणको अन्त्य गरि पठन पाठनको व्यवस्था मिलाईयोस्,
३. क्याम्पस प्रशासनद्वारा सार्वजनिक रुपमा माफी माग्दै आगामी दिनहरुमा सञ्चालक समितिको बैठकमा स्ववियु सभापतिको उपस्थिति अनिवार्य गराईयोस्,
४. क्याम्पस प्रमुखद्वारा अवैधानिक ढङ्गले आफ्नै परिवारको सदस्यको नियुक्ति उपप्राध्यापक पदमा गरिएकोले यस्ता अवैधानिक नियुक्ति खारेज गरियोस्,
५. मिति २०८२।०१।२४ गते बसेको बैठकमा शिक्षक कर्मचारीहरुले लामो समयदेखि त.भ. नपाएको गुनासो राख्दा उल्टै सञ्चालक समितिका जिम्मेवार सदस्यले दुर्व्यवहार गर्दै जागिर छोड्न धम्की दिएकाले त्यस्ता सञ्चालक समितिका पदाधिकारीलाई तत्काल पदबाट हटाई सार्वजनिक रुपमा माफी माग्न लगाईयोस् ।
६. क्याम्पस प्रमुख दिपकराज भण्डारीले २०८१।१२।१७ गते राजीनामा दिएकोमा २०८२।०१।२४ गते बसेको सञ्चालक समितिको बैठकले अल्पमतबाट क्याम्पस प्रमुखको राजीनामा अस्विकृत गर्ने निर्णय गरिएकोले सो निर्णय अवैधानिक भएको ठहर गर्दै निर्णय खारेज गरि सञ्चालक समितिको बहुमत वा सर्वसहमतबाट क्याम्पस प्रमुख नियुक्ति गरियोस् ।