धनगढी । माओवादी केन्द्र सुदूरपश्चिम प्रदेश संसदीय दलको नेताको जिम्मेवारी पुनः खगराज भट्ट पाएका छन् ।
माओवादी केन्द्रका अध्यक्ष पुष्पकमल दाहाल ‘प्रचण्ड’लगायतका केन्द्रीय पदाधिकारीको उपस्थितिमा बिहिबार डडेल्धुरामा बसेको संसदीय दलको बैठकले भट्टलाई दलको नेता बनाउने निर्णय गरेको हो ।
बैठकले भट्टलाई दलको नेता बनाउने सर्वसम्मत निर्णय गरेको प्रदेशसभा सदस्य एवं पूर्वमन्त्री रमेशसिंह धामीले जानकारी दिए ।
२०८० माघ १२ गते बहुमतबाट खगराज भट्टलाई हटाएर मानबहादुर धामीलाई दलको नेता बनाइएको थियो ।
बैठकमा माओवादी केन्द्रका सबै प्रदेशसभा सदस्यको उपस्थिति रहेको थियो ।
यसअघि अध्यक्ष प्रचण्डले संसदीय दलको नेता परिवर्तन गर्न लिखित तथा मौखिक निर्देशन दिएपनि कार्यान्वयन हुन सकेको थिएन ।
