धनगढी । परराष्ट्र मन्त्री डा.आरजु राणा देउवाले सुदूरपश्चिमको आर्थिक विकासमा लगानी सम्मेलनले महत्वपूर्ण भूमिका खेल्ने बताएकी छन् । मंगलबार धनगढी विमानस्थलमा सञ्चारकर्मीहरुसँग संक्षिप्त प्रतिक्रिया दिँदै उनले सुदूरपश्चिम सरकारले आयोजना गर्न लागेको लगानी सम्मेलनले विकासमा टेवा पुग्ने बताएकी हुन् ।
लगानी सम्मेलनमा सहभागी हुन यहाँ आइपुगेकी राणाले भनिन् ‘लगानी सम्मेलनले सुदूरपश्चिममा ठूला विकासका योजनाहरु निर्माणमा महत्वपूर्ण भूमिका खेल्ने छ ।’ उनले सुदूरपश्चिमबाट प्रतिनिधित्व गर्ने केन्द्रीय सरकारका मन्त्रीहरुले सुदूरपश्चिममा लगानी भित्र्याउन भूमिका खेल्नेमा समेत विश्वास व्यक्त गरिन । सुदूरपश्चिममा लगानीका लागि प्रचुर सम्भावना रहेकाले विभिन्न क्षेत्रबाट निजी लगानीका व्यवसायीहरु र दातृ निकायहरु उत्साहित भएको उनले बताइन् ।
उनले पछिल्लो समय नेपालमा लगानी गर्नेको संख्यामा वृद्धि हुन थाले पनि सरकारी ऐन कानुनका कारण केही कठिनाई हुने गरेको बताइन् । ऐन कानुन परिमार्जन गरी लगानीमैत्री कानुन निर्माण गर्नुपर्नेमा उनले जोड दिइन् ।
‘सुदूरपश्चिममा अथाह जलस्रोत छ,यहाँको जलस्रोतको सदूपयोग गरी लगानी गर्न सकेको खण्डमा सुदूरपश्चिम आर्थिक रुपमा समृद्ध हुने निश्चित छ’ उनले भनिन् ‘
सुदूरपश्चिम प्रदेश सरकारले आयोजना गरेको लगानी सम्मेलनमा सहभागी हुन धनगढी पुगेकी परराष्ट्र मन्त्री राणालगायत सुदूरपश्चिम प्रदेशका मुख्यमन्त्री कमलबहादुर शाह, मन्त्रीहरु, विदेशी नियोगका अधिकारीहरु र लगानीकर्ताहरुले आज कञ्चनपुर क्षेत्रको फिल्ड अवलोकन गर्ने कार्यक्रम रहेको जनाइएको छ । लगानी सम्मेलनकै क्रममा बुधबार धनगढीमा औपचारिक कार्यक्रम हुने भएको जनाइएको छ ।
