धनगढी । कैलालीमा मोटरसाइकल दुर्घटना हुँदा एक जनाको मृत्यु भएको छ ।
पूर्व–पश्चिम राजमार्ग अन्तर्गत घोडाघोडी नगरपालिका–१ स्थित भालुफटामा बिहीबार बिहान करिब सवा ४ बजे से ६ प ४४३६ नम्बरको मोटरसाइकल अनियन्त्रित भई सडकमा बिग्रिएर रोकेको सुपप्र ०१–००२ त ५१५८ नम्बरको ट्र्याक्टरको इन्जिन नभएको ट्रलीमा ठोक्किएर दुर्घटना भएको सुदूरपश्चिम प्रदेश प्रहरी कार्यालय धनगढीले जनाएको छ ।
दुर्घटनामा मोटरसाइकलको पछाडि सवार घोडाघोडी नगरपालिका–२ का २४ वर्षीय राधेश्याम चौधरी गम्भीर घाइते भइ उपचारका लागि घोडाघोडी अस्पताल लैजाँदै गर्दा उनको मृत्यु भएको प्रहरीले जनाएको छ ।
सुदूरपश्चिम प्रदेश प्रहरी कार्यालय धनगढीका अनुसार मोटरसाइकल चालक घोडाघोडी नगरपालिका–३ का २१ वर्षीय शंकर चौधरीको टाउकोमा गम्भीर चोट लागेको र उनको धनगढीस्थित माया मेट्रो अस्पतालमा उपचार भइरहेको छ।
त्यसैगरी, मोटरसाइकलमै सवार घोडाघोडी नगरपालिका–२ का २२ वर्षीय अर्जुन चौधरी घाइते भइ घोडाघोडी अस्पतालमा उपचार भइरहेको जनाइएको छ ।
