धनगढी । सुदूरपश्चिमका आन्तरिक मामिला तथा कानुनमन्त्री हीरासिंह सार्कीले विपदमा पूर्वसूचनाले जोखिम न्युनीकरणमा सहयोग पु¥याउने बताएका छन् ।
आइतबार प्रतिवद्ध परियोजनाको सहकार्यमा नेपाल पत्रकार महासंघ सुदूरपश्चिम प्रदेश समितिले धनगढीमा आयोजना गरेको विपद् सवालमा सञ्चारकर्मीसँग कार्यशालामा बोल्दै उनले यस्तो बताएका हुन् ।
उनलेविपदमा पूर्वसूचनाकाे भूमिका महत्वपूर्ण हुने बताए । उनले भने ‘विपद् पूर्व सूचना पुग्दा नागरिक सचेत बन्न सक्छन् । सूचनाको महत्वपूर्ण भूमिका हुन्छ ।’
उनले विभिन्न सञ्चारमाध्यमले गर्ने सही सूचना प्रवाहले जोखिमबाट नागरिक सजग बन्ने बताउँदै विपद् जोखिम भएका ठाउँका नागरिकसम्म पूर्व सूचना प्रवाह हुन आवश्यक भएको बताए । उनले विपद्मा क्षति नहोस् भन्ने उदेश्यले सरकारले काम गरिरहेको बताए ।
कार्यक्रममा प्रतिवद्ध परियोजनाका नवीन भण्डारीले सुदूरपश्चिम प्रदेशको विपद्का अवस्थाका बारेमा प्रस्तुतिकरण राखेका थिए । उनले यहाँ बाढी, पहिरो, आगलागी, चट्याङ, जनावर आतंकलगायतका विपद् जोखिम रहेको बताए ।
उनले पछिल्ला १० वर्षमा सुदूरपश्चिमा प्राकृतिक विपद्बाट ९७ करोडको क्षति भएको तथा ४ सय ३५ जनाले ज्यान गुमाएको बताए । कार्यक्रममा प्रतिवद्ध परियोजनाका कालिक घिमिरेले मौसम पूर्वानुमानमा आधारित पूर्वकार्यको अवस्था लगायतको बारेमा प्रस्तुतिकरण गरेका थिए ।
त्यस्तै सोही परियोजनाकी उषा जोशीले विपद् संवेदनशीलता,उत्तरदायी सामाजिक सुरक्षाका बारेमा प्रस्तुतिकरण राखेकी थिइन् । प्रतिवद्ध परियोजनाकी पुष्पा घलेले प्रकोप जोखिम वित्तपोषका बारेमा प्रस्तुति राखेकी थिइन् ।
पत्रकार टेकेन्द्र देउवाले सुदूरपश्चिमा विपद्मा सञ्चारकर्मीको भूमिका बारेमा प्रस्तुतिकरण गरेका थिए । नेपाल पत्रकार महासंघ सुदूरपश्चिम प्रदेश अध्यक्ष भरत शाहको अध्यक्षता भएको कार्यशालामा विभिन्न सञ्चारमाध्यममा आवद्ध पत्रकारहरुको सहभागिता रहेको थियो ।
